İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 202 Hüküm no: 76 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi’nin Kamerhatun Mahallesi’nde bulunan evinin borcunu ödemek için başkasına kiraya verildiği Takohi Nasrâniyye Galata hâricinde Kamer Hatun Mahallesi’nde olan menzili deyni için âhara îcâr olunduğunun ilmühaberi. Diruhi ve Takohi nâm Nasrâniyyeler dâyinlerine olan düyûnlarını ashâbına taksît ile edâ eylemeleri husûsuna dâir terâfu‘-ı şer‘-i şerîf olunmaları bâbında mahbûsdan Dîvân-ı Hümâyûn’a takdîm eyledikleri arzuhâllerine nezâret-i hazret-i Şeyhülislâm sellemehü’l-islâmîde âsûde evkāfdan cennet-mekân-ı firdevs-âşiyân merhûm ve mağfûrun-leh Sultan Bâyezid Hân-ı velî tâbe serâhu hazretlerinin İstanbul’da vâki‘ câmi‘-i şerîf ve imâret-i âmiresi evkāfından Kasım Paşa cibâyetine tâbi‘ Beyoğlu nâm mahalde Kamer Hatun Mahallesi’nde vâki‘ mersûme Takahi Nasrâniyye uhdesine olan bir bâb menzilin temessükü kaydı defter-i vakf-ı şerîf-i müşârun-ileyhe ba‘de’l-ihrâc Çarşamba günü Arzodası’nda mahbûsen terâfu‘-ı şer‘-i şerîf olunmak bâbında sâdır olan fermân-ı âlî mûcebince sâhibet-i arzuhâl şahısları mu‘arrefe olan Diruhi ve kız karındaşı Oskohi bintey Artin nâm Nasrâniyelerin ber-vech-i âtî bâ-i‘lâm-ı şer‘î mahkûmün-bih dâyinlerinden Nasrâniyyetân-ı mersûmetân zimmetlerinde bin guruş alacağı Darbhâneli Askar oğlu Andon v. Artin ve mersûme Diruhi Nasrâniyye zimmetinde sekiz yüz guruş alacağı olan Kigork v. Kabriyel ve yine Nasrâniyyetân-ı mesfûretân zimmetlerinde iki bin iki yüz seksen guruş alacağı olan diğer Diruhi bt. Bagdasar Nasrâniyyenin zevci ve tarafından vekîl-i müsbet-i şer‘îsi İstefan v. Hirabet ve yine Nasrâniyyetân-ı mersûmetân zimmetlerinde bin yüz yetmiş dokuz guruş alacağı Tomas v. Manuk ile er ve kız karındaşları Bedros zimmî ve Lusye ve diğer Diruhi Nasrâniyyeler taraflarından vekîl-i müseccel-i şer‘îleri Halebli Hanna v. Haco ve yine Nasrâniyyetân-ı mesfûretân zimmetlerinde bin altı yüz elli guruş alacağı olan Garyane bt. Artin ve Serpohi bt. Avanis Nasrâniyyeler taraflarından vekîl-i sâbitü’l-vekâleleri Artin v. Oseb zimmî ve yine Nasrâniyyetân-ı mesfûretân zimmetlerinde bin dört yüz yetmiş guruş alacağı olan Mariye bt. Nilgos Nasrâniyyenin oğlu vekîl-i sâbitü’l-vekâlesi Avanis v. Bedros ve Nasrâniyyetân-ı mesfûretân zimmetlerinde bin yüz kırk guruş alacağı olan Hindistanlı kızı Lusye bt. Adam Nasrâniyyenin vekîl-i şer‘îsi mersûm Hanna v. Haco ve yine Nasrâniyyetân-ı mesfûretân beş yüz altmış sekiz guruş alacağı olan Berincik bt. Oseb Nasrâniyye ve yine Nasrâniyyetân-ı mesfûretân zimmetlerinde yedi bin beş yüz guruşdan bâkī dört bin beş yüz guruş alacağı olan Francalı Petro v. Venina nâm müste’min bi’d-defa‘ât Çarşamba günleri Arzodası’nda huzûr-ı lâmi‘u’l-enver-i hazret-i sadâret-penâhîde ma‘kūd meclis-i şer‘-i münîrde medyûneleri mersûmetân Diruhi ve Takohi Nasrâniyyeler muvâcehelerinde Nasrâniyyetân-ı mesfûretân zimmetlerinde her birimizin yedlerimizde olan i‘lâmât-ı şer‘iyye mûceblerince cihât-ı düyûn-ı şer‘iyyeden mahkûmün-bih alacak hakkımız olan min-haysü’l-mecmû‘ on dört bin beş yüz seksen yedi guruşu Nasrâniyyetân-ı mersûmetân edâda mümâtale etmeleriyle zahr-ı arzuhâlde mastûr defter-i vakfdan muhrec derkenâr nâtık olduğu üzere Hudâvendigâr-ı esbak cennet-mekân-ı firdevs âşiyân Sultan Bâyezid Hân tâbe serâhu hazretleri evkāf-ı celîlelerinden mahrûse-i Galata hâricinde Beyoğlu nâm mahalde Kamer Hatun Mahallesi’nde vâki‘ mersûmetân Diruhi ve Takohi Nasrâniyyelerin anaları Serpohi bt. Manik Nasrâniyyenin bi’l-icâreteyn taht-ı tasarrufunda olup ba‘de helâkihâ kızları mersûmetâna ale’l-iştirâki’s-seviyy âdiyen intikāl ettikden sonra mersûm Diruhi Nasrâniyye nısf hisse-i şâyi‘asını kız karındaşı mersûme Takohi Nasrâniyye’ye bâ-re’s-i mütevellî fâriga olup ol vechile mersûme Takohi Nasrâniyyenin yüz bin guruş bedel-i fâriga tahammülü olarak müstakillen uhdesinde olan bir bâb menzil-i âhara ferağ ettirdilip deyn-i mezkûr edâ ettirilmek matlûbumuzdur deyü her biri bi’l-asâle ve bi’l-vekâle istid‘â eylediklerinde ba‘de’l-beyân mersûmetân mümâtalelerine binâen ve tediye-i düyûna sühûlet geleceğine ve tarafeyne hayırlı olduğuna ibtinâen bi’l-cümle dâyinleri rızâsıyla zikrolunan menzili dâyinleri mesfûrûndan her birine düyûnları edâ oluncaya değin beş sene senevî dört bin guruş icâre ile ma‘rifet-i şer‘le îcâr ettirilip ücret-i mezkûrenin beher sene bin guruş kifâf-ı nefsleri’çün kendilere ve mâ‘adâ üçer bin guruş dahi alâ-tarîkı’l-guremâ dâyinleri mesfûrûna edâ ve îfâ etmek ve menzil-i mezkûru bilâ-i‘lâm-ı şer‘î âhara ferağ eder ise i‘tibâr olunmamak üzere defter-i vakf-ı şerîfde kaydı bâlâsına şerh verilmek üzere sünûh eden irâde-i âsafâne İstanbul Mahkemesi’nde tescîl olunduğu huzûr-ı âlîye i‘lâm olundu deyü İstanbul Kādısı Mehmed Sâdık Efendi memhûren i‘lâm etmekle işbu i‘lâm bi-ibâretihâ kalemine kayd ile mûcebince amel ve hareket olunmak üzere defter-i vakfa [31b] ve İstanbul Mahkemesi ve Galata sicillâtına ayniyle ilmühaberleri i‘tâ olunmak bâbında fermân-ı âlî sâdır olmağın mûcebince Haremeyn muhâsebesi kalemi’ne kaydolunup ber-minvâl-i muharrer Galata sicillâtına ve defter-i vakf-ı şerîfe başka başka ilmühaberleri i‘tâ olunmağla vech-i meşrûh üzere İstanbul Mahkemesi’ne dahi işbu ilmühaber verildi. Fî 2 R sene [1]241.