İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 204 Hüküm no: 77 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul İhtisab mukataasının bir yıllığına mültezim Mehmed Hamdullah’a verildiği İhtisâb fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâ- ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki bâ-hatt-ı hümâyûn-ı şevket-makrûnum Darbhâne-i âmirem tarafından zabt ve idâre olunan mukāta‘ât-ı mîrîyemden ihtisâb-ı İstanbul ve tevâbi‘i mukāta‘asının sülüs hissesi Darbhâne-i âmiremde ve diğer sülüsân hissesi müşterekleri uhdesinde olup ötedenberü yed-i vâhidden zabt ve idâre oluna gelmekden nâşi mukāta‘a-i mezbûreyi işbu bin iki yüz kırk bir senesi Martı ibtidâsından sene-i merkūme Şubat’ı gāyetine değin bir sene-i kâmile yed-i vâhidden zabt ü rabt ve idâre eylemek üzere deruhde ve iltizâmına tâlib ve râgıb olan hâlâ mültezimi kıdvetü’l-emâcid ve’l-a‘yân Mehmed Hamdullah Bey zîde mecdühûya bâ-irâde-i seniyyem sâbıkı üzere ma‘a mâl ve kalemiye ve harc-ı aklâm ve fâiz-i mukāta‘a-i mezkûre cem‘an otuz sekiz bin guruş bedel-i iltizâm ile deruhde ve ilzâm ve ibkā olunup mûmâ-ileyh dahi iltizâm ve kabûl-birle bedel-i iltizâmı olan meblağ-ı mezbûru vakt ü zamânıyla edâ ve teslîm eylemek üzere Darbhâne-i âmirem hazînesine memhûr deyn temessükü vermeğin ber-minvâl-i muharrer mukāta‘a-i mezkûreyi sene-i merkūmeye mahsûben yed-i vâhidden zabt ü rabt ve idâre ve vâki‘ olan mahsûlât ve âidât ve rüsûmât kānûn-ı kadîm ve olageldiği üzere cem‘ ve tahsîl ve ahz u kabz eyleyip taraf-ı âhardan müdâhale ve ta‘arruz olunmamak üzere yed-i vâhidden zabtını hâvî emr-i şerîfim i‘tâsını mu‘teberân-ı ricâl-i Devlet-i aliyyemden hâlâ Darbhâne-i âmirem nâzırı iftihârü’l-ümerâ ve’l-ekâbir es-Seyyid Mehmed Esad dâme ulüvvühu memhûr temessüküyle inhâ etmeğin imdi mûcebince amel olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi sen ki mevlânâ-yı <> mûmâ-ileyhsin nâzır-ı mûmâ-ileyhin verdiği temessük mûcebince mukāta‘a-i mezkûreyi sene-i merkūmeye mahsûben mîr-i mûmâ-ileyh tarafından yed-i vâhidden zabt ü rabt ve idâre ve vâki‘ olan mahsûlât ve âidât ve rüsûmâtın kānûn-ı kadîm ve olageldiği <> vechile cem‘ ve tahsîl ve ahz u kabz ettirip hilâf-ı temessük ve mugāyir-i emr-i âlişânım taraf-ı âhardan müdâhale ve ta‘arruz ettirilmemesi husûsuna mezîd ihtimâm ve dikkat eyleyesin. Şöyle bilesin alâmet-i şerîfe i‘timâd kılasın. Fî 12 Ca sene [1]241. Be-makām-ı Kostantıniyyeti’l-mahrûse.