İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 205 Hüküm no: 78 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1241 senesi İstanbul avarız bedeli tahsili Avârız fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki Hazîne-i âmirem defterleri mûcebince Anadolu ve Rumeli câniblerinde vâki‘ kazâ ve kurâ hâne-i avârıza bağlı olan re‘âyâ ticâret tarîkiyle Âsitâne-i sa‘âdetime gelip tavattun üzere olup evtân-ı kadîmelerine iskân ve mukaddemâ sâdır olan fermân-ı âlîşânım mûcebince İstanbul’a dâhil olan Rûmiyân ve Yahûdiyân ve Ermeniyân üzerlerinde beş yüz elli iki buçuk ve buçuk sülüs avârız hâneleri olup bin iki yüz kırk bir senesine mahsûb olmak üzere cem‘ ve tahsîli lâzım gelmeğin deruhde olunup yedine mühürlü ve nişanlı Mevkūfât defteri sûreti verilmekle imdi mûcebince tahsîl ettirilmek fermânım olmuşdur. Buyurdum ki, hükm-i şerîfim vardıkda bu bâbda emrim üzere amel edip dahi sene-i mezbûra mahsûb olmak üzere kazâ-i mezbûrun ol mikdâr avârız hânelerinin beher hânesinden dörder yüz yirmi dokuzar akçe avârızları mâlların irsâl olunan mühürlü ve nişanlı Mevkūfât defteri sûreti mûcebince cem‘ ve tahsîl ve teslîm-i Tersâne-i âmirem ettirdip hilâf-ı emr-i defter kimesneye ta‘allül ve muhâlefet ettirmeyesin ve hîn-i tahsîlde avârız için alınan akçenin her yüz on akçesinden bir esedî guruş aldırdıp ve mîrî’çün alınan akçeyi Hazîne-i âmirem alındığı vech üzere aldırdıp bundan ziyâde ve noksan alınmaya ve aldırmayasız [ve] kesr-i defterden ve nakz-ı hâneden ve fermân-ı âlîşânımdan ziyâde mutâlebesiyle zulüm ve te‘addî olunmakdan ihtirâz ve ictinâb eyleyesiz. Şöyle bilesiz alâmet-i şerîfe i‘timâd kılasız. Fî 10 M sene [12]41. Kostantıniyyeti’l-mahrûse