İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 206 Hüküm no: 79 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da olabilecek yangınların önüne geçebilmek için uygulamaya konulan tedbirler İstanbul kādısı fazîletlü efendi. Dekâkîn saçaklarına dâir. Âsitâne-i sa‘âdetimde harîk zuhûr etmemesine çâre yoğise de hîn-i vukū‘unda hasbe’l-imkân etrâfa sirâyet etmemesi esbâbının istihsâli ve zâhirde sirâyete sebeb olan hâlâtın men‘i lâzımeden olmakdan nâşî kā‘ide-i mi‘mâriyeye tatbîk kimesneye zarâr <> olmayacak ve müstakar ve pâyidar olacak sûretlere hüsn-i râbıtaya bend olunması husûsu mukaddemâ iktizâ edenler ile bi’l-müzâkere fîmâ ba‘d ebniyelerin sirâyet-i harîkden muhâfazasıçin tahta-pûş ve ahşâb saçak olunmamak nizâmını müstakar ve pâyidar olması ve ehl-i İslâmdan olsun ve re‘âyâdan olsun zî-kudret olanlar yeni hâne beynine çatıdan bir zirâ‘ mikdârı terfî‘ olunarak kârgîr duvar yapmak ve işbu yapılacak kârgîr duvarın inşâsına medâr-ı sühûlet olmak için bi’l-iştirâk mesârifi <> verilerek yapdırılması ve Dârü’l-hilâfeti’l-aliyye ve havâlîsinde kâin büyût ve dekâkîn ve ebniye-i sâirenin taşra tarafları ve kalafat saçakları tahta kaplama ve kara saçak döşemeyip bi’l-cümle hâlis horasanlı kârgîr sıva kapılı ocak inşâ olunmak ve dekâkîn üzerine tahta-pûş misilli peykeler ve asmalık ve kepenk ve mandalından ziyâde saçak yapılmak ve dekâkîn-i mütenevvi‘a üzerine kadîmi vechile oda inşâsı kendilerine mahsûs olmamak ve hâricden nerdübân ve kapı inşâsıyla âhara icârı husûsuna ruhsat verilmemesi ve ehl-i İslâmdan zî-kudret olanlar binâ edeceği hânesinde câ be-câ nîm kârgîr yapdırılmasına ruhsat verildiği sûretde kârgîr hâneler misilli sakfı tuğladan kemer yapılmayıp etrâfı taş duvar ve sakfı ve döşemesi ahşâb olmak ve ahşâb ebniyenin katına verilecek müsâ‘ade-i seniyye işbu nîm kârgîr ebniyenin hakkında dahi cârî olmak ve işbu kârgîr ebniye inşâsı yalnız ehl-i İslâma mahsûs olup re‘âyâya kat‘â ruhsat verilmemesi husûsları atebe-i ulyâda mülûkâneye lede’l-arz ol bâbda müsâ‘ade-i seniyye-i erzânî üzere buyrulmuş olmak hasebiyle <> işbu nizâmâtın icrâsı iktizâ edenlere hitâben beyaz üzerine fermân-ı âlî ısdârıyla tenbîh olunarak tafsîlen sicill-i mehâkime kayd ü sebt ettirilmiş olmağla imdi işbu ebniye husûsuna dâir mukaddemâ sudûr eden irâde-i seniyyeyi sicilden mürâca‘at ile ihâta ve istihzâr ve bunlara müte‘allık de‘âvi-yi şer‘iyye zuhûrunda sirâyet-i harîk men‘i’çün ihtiyâr olunan işbu nizâm sâbıkda nakz ve halelden vikāyesi esbâbının istihsâline ve devâm-ı istimrârı vesâilini istikmâle mübâderet eyleyesin deyü. Selh-i Ca sene [12]41