İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 207 Hüküm no: 80 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya elçiliğine ait olmak üzere bir fırının açılmasına izin verildiği Başmuhâsebe’ye dahi ilmühaber verilmişdir. Rusya elçisinin istid‘â edeceği francala fırınına dâir ilmühaber. Mahrûse-i Galata’da Asmaaltı nâm mahalde Rusyalıya mahsûs olmak üzere bâ-hatt-ı hümâyûn tevkīf olunan bir bâb fırını bundan akdem Rusya sefiri bi’l-istid‘â sedd ü bend ettirmiş ise de el-hâletü hâzihî düvel-i mütehâbbe süferâsına mahsûs olan fırınlar küşâde olup Rusya sefirinin fırını olmadığından bahisle fırın-ı mezkûrun küşâdına ruhsat-ı aliyye erzân buyrulmasını Rusya Maslahatgüzârı Ceneral Minciyaki Bâb-ı âlî’ye takdîm eylediği bir kıt‘a memhûr takrîrinde istid‘â ve muktezâsı i‘lâm olunmak üzere bâ-fermân-ı âlî taraf-ı dâ‘îyâneme lede’l-havâle fi’l-hakīka fırın-ı mezkûr mukaddemâ francalacı fırınlarının esnâ-yı nizâmında rikāb-ı kamer-tâb-ı mülûkâneye takdîm olunan defterde sürhle “tevkīf oluna” deyü sâdır olan hatt-ı hümâyûn-ı adâlet-makrûn-ı şehinşâhî ile ibkā olunmuş ve ba‘dehû Rusyalı tarafından tasarruf olunmadığı Rusya Tercümanı Frankini ihbâr ettiğine binâen fırın-ı mezkûrun sedd ü bendi iktizâ eylediğini otuz altı senesi hilâlinde İslâmbol Kādısı bulunan Ebulhayr Efendi merhûm i‘lâm etmekle i‘lâm-ı mezkûr bâ-takrîr mübârek rikāb-ı müstetâb-ı hazret-i cihândârîye lede’l-arz İstanbul kādısının i‘lâmı mûcebince fırın-ı mezkûr sedd ü bend olunup bundan böyle Rusya elçisinin istid‘â edeceği fırına ruhsat verile deyü hatt-ı hümâyûn-ı inâyet-makrûn-ı hazret-i hilâfet-penâhî şeref-pâş-ı sahîfe-i sudûr olduğu sicill-i mahfûzda mukayyed emr-i âlî sûretinden müstebân ve Rusya elçisinin ancak kendi dâiresine mahsûs olarak bir bâb francalacı fırını küşâdına ruhsat i‘tâsı muktezî hatt-ı hümâyûn-ı mehâbet-makrûn-ı hazret-i kîtî-sitânîden olduğu zâhir ve ayân olmağın bu sûretde mukaddemâ kendilerinin olmadığını beyân ile sedd ü bend olunmuş olan fırın-ı mezkûrun ber-vech-i muharrer Rusya sefâretine mahsûs olmak üzere şürûtu derciyle küşâdına ruhsat-ı aliyye erzân buyrulup sicill-i mahfûza ba‘de’l-kayd Başmuhâsebe’ye ilmühaberi verilmek iktizâ eylediğini müş‘ir sâdır olan fermân-ı âlîye imtisâlen takrîr-i mezkûr zahrına cânib-i dâ‘iyânemden tahrîr olunan i‘lâm bâlâsına francalacı fırınlarının esnâ-yı nizâmında Galata’da Asmaaltı nâm mahalde tevkīf olunan bir bâb Rusyalı fırını Rusya süferâsına mahsûs olmadığı Rusya sefâreti tarafından inhâ olunarak sedd ü bend olunup bundan böyle Rusya elçisinin istid‘â edeceği fırına ruhsat verilmek üzere hatt-ı hümâyûn-ı şevket-makrûn-ı şâhâne şeref-rîz-i sudûr etmiş idiği i‘lâmınızdan ve Başmuhâsebe derkenârından müstebân olup el-hâletü hâzihî fırın-ı mezkûrun Rusya sefâretine mahsûs olmak üzere küşâdına ruhsat verilmesi maslahatgüzâr-ı mûmâ-ileyh tarafından istid‘â olunmakdan nâşî fırın-ı mezkûr Rusya sefâretine mahsûs olmak ve küfe ve tabla ve vücûh-ı âhar ile esvâk ve pazarda francala bey‘ olunmamak şartıyla ber-mantûk-ı hatt-ı hümâyûn küşâd olunup fırın-ı mezkûr sicill-i [32b] mahfûza kayd ile Dîvân-ı Hümâyûn ve Başmuhâsebe’ye ilmühaberlerini i‘tâ ettirdesin deyü sâdır olan fermân-ı âlîşân mûcebince fırın-ı mezkûrun küşâdına ruhsat olunduğu sicill-i mahfûza kaydolunup ber-minvâl-i muharrer Dîvân-ı Hümâyûn’a başka ilmühaber i‘tâ olunmağla vech-i meşrûh üzere Başmuhâsebe’ye dahi İstanbul Mahkemesi’nden işbu ilmühaber verildi. Fî 3 B sene [1]241.