İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 208 Hüküm no: 81 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya elçiliğine ait olmak üzere bir fırının açılmasına izin verildiği Husûs-ı mezkûri’çün verilen i‘lâm dahi i‘lâmât sicilline kaydolunmuşdur. Vakt-i hâcetde nazar oluna gaflet olunmaya. Bâ-sah. İstanbul kādısı fazîletlü efendi. Fırancılacı fırınlarının esnâ-yı nizâmında Galata’da Asmaaltı nâm mahalde tevkīf olunan bir bâb Rusyalı fırını Rusya sefâretine mahsûs olmadığı Rusya sefâreti tarafından inhâ olunarak sedd ü bend olunup bundan böyle Rusya elçisinin istid‘â edeceği fırına ruhsat verilmek üzere hatt-ı hümâyûn-ı şevket-makrûn-ı şâhâne şeref-rîz-i sudûr etmiş idiği i‘lâmınızdan ve Başmuhâsebe derkenârından müstebân olup el-hâletü hâzihî fırını mezkûrun Rusya sefâretine mahsûs olmak üzere küşâdına ruhsat verilmesi maslahatgüzâr-ı mûmâ-ileyh tarafından istid‘â olunmakdan nâşî fırın-ı mezkûr Rusya sefâretine mahsûs olmak ve küfe ve tabla ve vücûh-ı âhar ile esvâk ve pazarda francala bey‘ olunmamak şartıyla <> ber-mantûk-ı hatt-ı hümâyûn küşâd olunup fırın-ı mezkûr sicill-i mahfûza kayd ile Dîvân-ı Hümâyûn’a ve Başmuhâsebe’ye ilmühaberlerini i‘tâ ettiresin deyü. Fî 2 B sene [1]241. Ma‘rûz İşbu i‘lâm-ı dâ‘iyânem bâlâsına şeref-yâfte-i sahîfe-i sudûr olan fermân-ı âlîlerine imtisâlen fırın-ı mezkûrun küşâdına ruhsat buyrulduğu husûs sicill-i mahfûza kaydolunup Dîvân-ı Hümâyûn ve Başmuhâsebe tarafına ilmühaberleri i‘tâ olunduğu İstanbul Mahkemesi’nden huzûr-ı âlîlerine i‘lâm olundu. Fî 3 B sene [1]241.