İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 209 Hüküm no: 82 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekke ve Medine’ye gönderilecek mektup ve torbaların içerisine ağır bir şey konulmaması Bâ-sah. İstanbul kādısı fazîletlü efendi. Müjdecibaşılara teslîm olunan haml-i sakīl maddesine dâir. Mekke-i mükerreme ve Medîne-i münevvere ahâlîlerine beher sene Dersa‘âdet’den irsâl olunmakda olan surre mektûbları <> ve ol tarafdan gönderilen cevâbnâmeleri kemâ-hiye-hakkuhâ ashâbı câniblerine vâsıl olamayarak karışıklık vukū‘a gelmesi müjdecibaşıların tam‘an ziyâde eşyâ alarak esnâ-yı râhda idâreye muvaffak olamamasından neş’et etmiş olduğundan başka ba‘zı bu tarafdan gönderilen tobralara dahi haml-i sakīl eşyâ vaz‘ olunduğu haber verilmiş ve bu maddenin bir hüsn-i nizâma rabt ve tevsîkiyle ahâlî Beldeteyn-i mükerremeteynin medâr-ı ta‘ayyüşleri olan surreleri ve mücâvirîn emânetlerinin telefden vikāyesi lâzım gelmiş olduğundan fîmâ ba‘d Mekke-i mükerreme ve Medîne-i münevvere’ye gidecek mekâtib ve emânet tobraları bi-mennihî te‘âlâ Şa‘bân-ı şerîfin on beşinci gününden bed’ ile gurre-i Ramazan-ı şerîf’e kadar on beş gün müddet ta‘yîn ile a‘lâ ve ednâ her kim olur ise olsun tobra ve mektûblarını Haremeyn muhâsebesi kalemine götürüp ve gönderip müjdecibaşılar hâzır oldukları hâlde bizzât Haremeyn muhâsebecisi efendi nezâret ile tobralarda mekâtibden mâ‘adâ haml-i sakīl olmayıp cüz’î hediyeler ibkā ve mest ve papuç ve câmeşûy ve emti‘a-i sâire o makūle eşyâ olduğu hissolunan tobralar kabûl olunmayıp ashâbına red ve i‘tâ olunmak üzere karâr verilerek keyfiyet hâkipây-i hümâyûn-ı şâhâneden lede’l-istîzân ol vechile icrâsı husûsuna irâde-i seniyye-i mülûkâne şâyân buyrulmuş olmağla keyfiyet ashâb-ı mekâtibin ma‘lûmları olarak heman Şa‘bân-ı şerîfin on beşinden Ramazan-ı mübârek’in gurresine kadar herkes mektûb ve tobralarını Haremeyn muhâsebesi kalemi’ne götürüp teslîm eylemek üzere keyfiyeti mahalleleri ahâlîsine ifâde ve i‘lân eylemelerini bi’l-cümle mahallât imâmlarını celb ile tenbîh ve ifâdeye mübâderet eyleyesin deyü. Fî 15 B sene [1]241.