İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 210 Hüküm no: 83 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzu etinin belirlenen fiyattan fazlaya satılmaması Bâ-sah. İstanbul kādısı fazîletlü efendi. Kuzu narhı. Dersa‘âdet’de mutavattın ibâdullâhın tevsî‘-i dâire-i ta‘ayyüşleriyle ezher-cihet zarûretden vikāyetleri matlûb olup el-hâletü hâzihî rûz-ı Hızır takarrüb <> etmekde olduğuna ve hamden lillâhi te‘âlâ bu sene-i mübârekede kuzunun vefret üzere olduğu hüveydâ idiğine binâen Rumeli ve Anadolu taraflarından ve civâr-ı saltanat-ı seniyyede kâin ba‘zı çiftlik ve mandıralardan vürûd edecek kuzuların cümlesini doğru Yedikule’ye sevk olunup ta‘ahhüd olunduğu üzere ashâbı beher kıyyesini kasab esnâfına otuz üçer paraya vermek ve kasablar dahi ikişer para kâr ile otuz beşer paraya ibâdullâha bey‘ etmek üzere nizâma rabt olunmuş olduğundan bi-mennihî te‘âlâ vakti hulûlünde fiyat-ı mezkûre üzere ibâdullâha kuzu bey‘ ve fürûht ettirilmesi husûsu tarafınızdan i‘lâm olunmuş olduğunu mebnî keyfiyet hâkipây-i hümâyûn hazret-i pâdişâhîye lede’l-arz hiç ferdin ayakdan kuzu fürûht etmemesi ve köşebaşlarında ve kasab dükkânlarında kuzu zebh olunmayıp hilâfına cesâret ederi olur ise o makūlelerin kuzuları mahâll-i tevzî‘a sevk olunması husûslarına irâde-i seniyye-i şâhâne ta‘alluk ederek keyfiyet Hâssa kasabbaşısı ile sâir iktizâ edenlere îcâbı vechile tenbîh ve beyân olunmuş olmağla imdi siz dahi lâzım gelenleri nezdinize celb ederek tâife-i kassabânın narh-ı cârîden bir akçe ziyâdeye kuzu bey‘ ve fürûht etmemek ve dükkânlarında dahi kuzu zebh etmemek üzere sûret-i irâdeyi tefhîme ve hilâfını cesâret ederi olur ise tedîb [33a] olunacaklarını ifâdeye dikkat-birle işbu nizâmın düstûrü’l-amel tutulması esbâbını istihsâle mübâderet eyleyesin deyü. Fî 15 N sene 1241.