İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 224 Hüküm no: 93 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni oluşturulan Asâkir-i Mansûre-i Muhammediye’nin her yüz neferine birer okul ve birer imâm tayin edilmesi emri Bâ-sahh-ı âlî. İstanbul kādısı fazîletlü efendi. Asâkir-i Mansûre’nin beher sınıfına birer imâm efendi nasbı bâbında emr-i âlî. Bu def‘a bi-tevfīkillâhi te‘âlâ tertîb ve tahrîrine şürû‘ ve mübâşeret olunmuş olan Asâkir-i Mansûre-i Muhammediye’nin ma‘âş ve ta‘yînât ve ta‘lîm ve ta‘allümlerine ve nizâmât-ı sâirelerine dâir ittifâk-ı ârâ ile karâr-gîr olup bâlâsı hatt-ı şerîf-i şevket-redîf-i hazret-i şehinşâhî ile tevşîh buyrulmuş olan kānûnnâme-i hümâyûnda bi-mennihî te‘âlâ tertîb ve tahrîr olunmakda olan Asâkir-i Mansûre sefer ve hazarda evkāt-ı hamseyi cemâ‘atle edâ ve yüz neferden ibâret olan beher safın kışlalarına birer mekteb inşâsıyla günde birer nevbet Kur’ân-ı azîmü’ş-şân ve a‘vâma lâzım olacak mesâil dîniyye ve ilmihâllerini ve ba‘dehû Birgivî risâlesini ta‘lîm ve tefhîm zımnında ma‘rifetiniz ile bi’l-imtihân ve bi’l-intihâb zikrolunan beher safa birer muvazzaf imâm nasb ve ta‘yîn olunması ve neferât-ı merkūma yapılacak mekteblerde külle yevm birer nevbet ta‘lîm-i dîn ve diyânet ve hem cemâ‘at ile edâ-yı salât eylemelerine imâm efendilerin nasb-ı nefsü’l-ihtimâm eylemesi ve bunların her birine mâhiye sûretiyle otuzar guruş verilmesi maddeleri münderic ve musarrah olmağla imdi Asâkir-i Mansûre-i Muhammedi’ye nâzırı efendi ile bi’l-muhâbere beher safa külle yevm edâ-yı salâtı ettirmek ve birer nevbet Kur’ân-ı azîmü’ş-şân ve ilmihâl kırâetiyle ta‘lîm-i dîn [ve] diyânet eylemek ve’l-hâsıl bunlar hem imâmet ve hem mekteb hocalığı etmek üzere erbâb-ı istihkākdan bi’l-imtihân ve bi’l-intihâb âlimü bi’l-mesâil ve kāri ve mücevvid birer imâm efendi tedârik-birle nasb ve ta‘yîn ederek bi-mennihî te‘âlâ cümlesinin ardı alındıkdan sonra iktizâsı icrâ olunmak üzere defterinin nâzır-ı mûmâ-ileyh tarafına takdîmi husûsuna mübâderet eyleyesin deyü. Fî 3 Z sene [1]241.