İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 225 Hüküm no: 94 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurbanda kesilecek hayvanların sakatat ve artıklarının sokak aralarına bırakılmaması ve bayram dolayısıyla kadınların çarşı pazarda gezmemeleri emri Bâ-sahh-ı âlî. İstanbul kādısı fazîletlü efendi. Îd-i adhâ’da nisâ tâifesinin sokağa çıkmamağa fermân-ı âlî. İşbu Îd-i adhâ-yı meserret-fermâda zebh olunacak karâbînin baş ve ayak ve ciğer ve fazalâtının miyân-ı esvâk ve köşe ve bucaklara ilkā ile râyiha-i kerîhe hudûsuna sebeb ve illet olanların ve bâ-fermân-ı âlî memnû‘âtdan olan nisvân tâifesinin esvâk ve pazar ve mahallât aralarında geşt ü güzârlarının men‘ ve def‘i mühim ve muktezî olmağla imdi mahallât imâmlarını meclis-i şer‘a da‘vet ve işbu îd-i şerîfin ibtidâsı gününden hitâmına dek nisâ tâifesi esvâk ve pazar ve mahallâtda geşt ü güzâr etmeyip büyûtunda karâr ettirilmesi ve kurbânların baş ve ayak ve ciğer ve fazalâtın miyân-ı esvâk ve pazar ve köşe ve bucaklara ilkā olunmaması husûslarını tenbîh ve tekîde mübâderet ve her kim fermân-ı âlîye mugāyir hareketde bulunur ise gereği gibi tedîb olunacakları muhakkak idiğini her bir imâma başka başka mahalle ahâlîsine tefhîm ve ifâdeye mübâderet eylemeleriçin cümlesine mazmûn-ı fermân-ı âlîyi i‘lân ve işâ‘at eyleyesin deyü. Fî 9 Z sene [1]241.