İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 226 Hüküm no: 96 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da herkesin ev ve dükkânlarının önünü temizleyerek çarşı ve pazarın temiz tutulması emri Bâ-sahh. İstanbul kādısı fazîletlü efendi. Esvâk ve pazarı mezbeleden tathîr fermânı. Âsitâne-i sa‘âdetimde kâin bi’l-cümle esvâk ve mahallât aralarının bir takım mülevvesât ve muzahrafâtdan tanzîf ve tathîriyle ümmet-i Muhammed’in ezâdan muhâfazaları lâzımeden olarak bu husûs mukaddemlerde buyruldular tahrîriyle iktizâ edenlere tenbîh ve tekîd olunmakda iken bir müddetden beri bu usûle ri‘âyet olunamadığından ekser-i nâs menzillerinin çirkâblarını esvâka icrâ ve ba‘zı hâne ve dükkânların önlerine dahi mezbele ilkā etmekde olduklarından esvâk ve pazardan mürûr u ubûr eden ümmet-i Muhammed müteezzî olmakda ve husûsuyla eyyâm-ı sayfda zuhûr eden ta‘affünât-ı kerîhesi cihetiyle ekser-i nâs muhtelü’d-dimâğ etmekde olduğu zâhir ve nezâfet-i İslâmiyeye yakışmayan şu emr-i mekrûhun dahi fîmâ ba‘d men‘ ve def‘i îcâb-ı hâlden idiği bedîhî ve bâhir olmağla fîmâ ba‘d ashâb-ı menâzil müctemi‘ olan çirkâbı sokaklara icrâdan ve şuraya buraya mezbele ilkāsınden men‘ ve zecr olunarak herkes menzil ve dükkânları pîşgâhını süpürüp tanzîf ve tathîr eylemelerini ve bundan sonra dahi dinlemeyip de bir mahalde her kimin hâne ve dükkânı pîşgâhında çirkâb ve mezbele makūlesi müşâhede olunur ise cesâret edenler mesûl ve mu‘âteb olacaklarını herkese i‘lân ve tenbîh eylemeleri husûsu bi’l-cümle mahallât imâmlarına ve iktizâ eden zâbitâna tenbîh ve tekîde mübâderet ve siz dahi şu maddeye i‘tinâ ve nezâret ile ibâdullâhın ezâdan muhâfazaları esbâbını istihsâle himmet eyleyesiz deyü. Fî 19 Z sene [12]41.