Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 394 Hüküm no: 457 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Reis b. Mustafa’nın arpa taşıma ücretini tamamen aldığı Vilâyet-i Anadolu’da Amasra kal‘ası ahâlîsinden şahbaz Hasan Reis b. Mustafa meclis-i şer‘-i hatîr-i enverde taraf-ı saltanat-ı aliyyeden bin doksan beş senesinde bâ fermân-ı âlî Bolu sancağından asker-i İslâm için iştirâ olunup Rumeli’nde İsakcı iskelesine irsâl için şa‘îrin cem‘ine me’mûr olan bâ‘isü hâze’l-kitâb el-Hâc Hüseyin Ağa b. Veli’nin vekîl-i müsecceli olan el-Hâc Ali b. Abdullah mahzarında ikrâr ve takrîr-i kelâm [edip] müvekkil-i mezbûr yedimde olan hüccet nâtıka olduğu üzre Bartın iskelesinde der anbâr olan zikri sebk eden mîrî şa‘îrden iki bin üç yüz keyl-i İstanbulî şa‘îri sefîneye tahmîl ettiğinden sonra fermân-ı âlî mûcebince her keyl için ta‘yîn olunan sekizer navuldan müvekkil-i mezbûr ta‘yîn olunan dörder akçe ki cem‘an dokuz bin iki yüz akçeyi mezbûr el-Hâc Hüseyin Ağa ber vech-i peşîn mukaddemâ bana teslîm ben dahi ba‘de’l-ahz u kabz mârrü’z-zikr şa‘îri Vidin iskelesinde kabza me’mûr olan kapıcıbaşı Yusuf Ağa’ya teslîm ol dahi kabz ve yedime işbu teslîm temessükünü verdiğinden sonra hâlâ ben dahi zikr olunan temessükü vekîl-i mezbûr el-Hâc Ali Ağa’ya ba‘de’t-teslîm mezbûr el-Hâc Ali Ağa’ya vech-i meşrûh üzre zikr olunan navldan bâkī kalan dokuz bin altı yüz akçeyi dahi bi’l-vekâle bana teslîm ben dahi kabz ve tesellüm eyledim min ba‘d hakkım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc İsmail b. Abdullah, el-Hâc Resul b. Mehmed, el-Hâc Mustafa b. Tevekkül, Ahmed Çelebi b. Mehmed.