Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 394 Hüküm no: 458 Orijinal metin no: [73b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikefos v. Kirkor’un çocuklarına işlerini tesviyeye vasî tayin edilmesi Mahmiye-i İstanbul’da İnebey mahallesinde sâkin Nikefos v. Kirkor v. Murad tarafından husûs-ı âti’l-beyâna vekîl olduğu Mustafa Çelebi b. Ömer ve Ali b. Muhtar nâm kimesneler şehâdetleriyle şer‘an sâbit olan Mehmed Çelebi b. Abdullah meclis-i şer‘-i şerîfde işbu sâhibü’l-vesîka Meczador v. Yani mahzarında bi’l-vekâle ikrâr ve takrîr-i kelâm edip müvekkilim mezbûr Nikefos alîlü’l-mizâc olmağla bi emrillâhi te‘âlâ hâlik oldukda mecmû‘-ı terekesini kabz ve içinden mu‘tâd-ı nasârâ üzre lâşesini kaldırıp ve mâ‘adâsından evlâd-ı sıgārı Şehbar ve Deros ve Gevher ve Abo’ya isâbet eden hisse-i irsiyyelerini zabt ve hıfz ve bi’l-cümle umûrlarını tesviyeye mezbûr Meczador’u vasiyy-i muhtâr nasb ve ta‘yîn eyledi dedikde ol dahi vesâyet-i mezkûreyi kabûl ve hizmet-i lâzımesini kemâ yenbağī edâya ta‘ahhüd etmeğin işbu vesîka bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Çelebi b. Hüseyin, el-Hâc Mustafa b. Yusuf, İbrahim Çelebi b. Ahmed, Mehmed Çelebi b. İdris.