İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 230 Hüküm no: 103 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da yangından dolayı açıkta ve çaresiz kalanların kiralık evlere yerleştirilmesi ve bunu fırsata çevirecek olanlara imkân tanınmaması emri Bâ-sahh. İstanbul kādısı fazîletlü efendi. Bu def‘a derûn-ı Âsitâne-i devlet-âşiyânda mahz-ı terbiye-i İlâhîye olmak üzere bi-irâdetillâhî te‘âlâ vukū‘ bulan harîkde ekser büyût-ı Müslimîn muhterik olarak bir takım ricâl ve nisvân ve etfâl ve sıbyân tahlîsine zafer-yâb olabildikleri eşyâları ve ekserî kuru cânlarıyla cevâmi‘-i şerîfe havlularında ve şurada burada ikāmetle mübtelâ-yı sefâlet olmakda oldukları derkâr ve bi-hıfzıhî te‘âlâ şu mesâible musâb olmayan ehl-i îmân selâmet-i hâllerine teşekküren kadîmden kirâya vermekde oldukları menzillerini kadîm kirâlarıyla îcâr ederek ve hâneleri vüs‘atli olanlar dahi yine münâsibi ve mu‘tâd kirâ ile hânelerine iktizâsına göre birer ve ikişer iskân eyleyerek o makūle sefîl ve sergerdân olan dîn karındaşlarımıza imdâd ve i‘âne eylemeleri mütehattim-i uhde-i diyânet idiği bedîhî ve bedîdâr olmakdan nâşî imdi derûn-ı İstanbul’da olan bi’l-cümle mahallât imâmlarını huzûrunuza celb ile her ne kadar kirâ menzilleri var ise kadîm kirâlarına bir akçe ve bir habbe zammettirilmeyip yine icâre-i kadîmesiyle o misilli hasâr-dîde olan ümmet-i Muhammed’e îcâr ederek ve menzilleri vüs‘atli olup da ashâbının ikāmetine lüzûmundan fazla olan ve tesettür ve tahaffuz mümkün olabilen menzillere dahi yine mu‘tâd ve münâsib icâre ile bunlardan birer ikişer ikāme ve iskân eyleyerek mâl ve emlâklerinden mehcûr ve mahzûn-ı infirâd olan bir takım derd-mendânın bir iki gün zarfında birer mahalle yerleşdirilmesi husûsuna ikdâm ve gayret eylemelerini ve ba‘zı erbâb-ı tama‘ ve irtikâb şu maddeyi cerr-i nef‘a vesîle ittihâz edip de ötedenberü kirâya vermekde oldukları menzillerinin kirâlarını artırmak ve menzillerinin lüzûmundan fazla olan ve tesettür ve tahaffuz mümkün olabilen mahallerine kirâcı almamak dâ‘iyesinde olurlar ise vâki‘ olacak a‘zârlarına havâle-i sem‘-i i‘tibâr olunmayarak lede’t-tahkīk icrâ-yı tedîblerine ibtidâr olunacağını mahallelerinde bulunan o makūle menâzil ashâbına firâde firâde ifâde [38b] ve i‘lân ve dinlemeyen olur ise derhâl tarafınıza ihbâr eylemeleri husûsunu etrâfıyla tenbîh ve tekîde dikkat ve siz dahi bir tarafdan taharrî ve tecessüsden hâlî olmayarak muktezâ-yı irâde-i seniyyeyi lâyıkıyla icrâsına mübâderet eyleyesin deyü. Fî 28 M sene [12]42. < İstanbul kādısı fazîletlü efendi. Cümleye ma‘lûm olduğu üzere nice müddetden beri dîn ü Devlet-i aliyye gûnâ-gûn ihânet hıyânet ve envâ‘-ı fesâd ve şenâ‘atları meşhût ve mütehakkık olan Yeniçeri ocağı ecma‘-ı ulemâ-yı ümmet ve ittifâk-ı hayr-hâhât-ı dîn ü devlet ile ber-muktezâ-yı şerî‘at-ı mutahhara gülpek>>