İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 245 Hüküm no: 109 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırın ve değirmenlerde çalışanların günlük ücretlerini tespiti Bâ-sahh-ı âlî. İstanbul kādısı fazîletlü efendi. Habbâzân esnâfının amele ücreti zammı için emr-i âlî. Dersa‘âdet ve Bilâd-ı selâsede kâin habbâzân fırın ve değirmenlerde istihdâm olunan Arnabud vesâir amele bundan akdem memleketlerine tard ve i‘zâm olunmuş olduğundan ol vechile cümleye amele fıkdân gelerek Çirmen sancağı kazâlarından akdemce vâfir amele celb ve habbâzân kethüdâsı ve esnâf ustaları ma‘rifetiyle fırın ve değirmenlere tevzî‘ ve taksîm edilmiş ise de amele-i merkūme ziyâde yevmiyye mutâlebesiyle firâr etmekde olduklarından bu def‘a vakt ü hâl iktizâsına göre mukaddemâ verilen yevmiyyelerine birer mikdâr şey zammıyla fîmâ ba‘d her bir fırın ve değirmende istihdâm olunan amele ziyâde yevmiyye mutâlebe ve firâra ibtidâr eder ise bulunduğu mahallin hâkimi ve zâbiti ma‘rifetiyle tedîb ve yine istihdâm olunduğu mahalle teslîm ile fırın ve değirmen ustaları dahi noksan yevmiyye teklîf eder ise onlar dahi muâheze olunması husûsu bu def‘a Zahîre nâzırı [41b] efendi tarafından bâ-takrîr ifâde olunmak ve amele-i merkūmenin bu def‘a ma‘a zam verilmekde olan yevmiyyeleri keyfiyeti Hâssa mi‘mâr ağadan suâl olundukda kadr-i kifâye idiğini ihbâr etmiş olduğundan fîmâ ba‘d her bir fırın ve değirmende olan amele bilinip firâr eden mîrî’çün İhtisâb ağası tarafından yedlerine birer memhûr tezkire verilmek üzere bu def‘a ağa-yı mûmâ-ileyh Bâb-ı âlî’ye celb ile tenbîh kılınmış olmağla imdi fîmâ ba‘d Dersa‘âdet’de kâin fırın ve değirmenlerde istihdâm olunan ameleden ziyâde yevmiyye mutâlebe ve firâr eder olur ise buldurulup iktizâ eden tedîb bi’l-icrâ yine olduğu mahalle teslîm ettirilmesi ve ol vechile yedlerine İhtisâb ağası tarafından tezkire verilmesi râbıtasının icrâ ve ikmâline mübâderet ve bu husûsa siz dahi ale’d-devâm ihtimâm ve dikkat eyleysin deyü. Fî 14 S sene 1242. Habbâzân fırınlarında istihdâm olunan amelenin ücret-i kadîmelerini müş‘ir ve bu def‘a vakt-i hâle nazaran birer mikdâr zammıyla nizâma rabt olunan ücretlerinin mikdârını müsteş‘ir defteridir. Fî 15 S sene [1]242. Habbâzanın amele ücreti zammı defteri. Pişirici: 1 nefer Yevmiyye 85 para 08 bahâ-yı nân +---- 93 07 bu def‘a zam +---- 100 Yüz paradır. Hamîrgâr: 1 nefer Yevmiyye 65 para 08 bahâ-yı nân +---- 73 07 bu def‘a zam +---- 80 Seksen paradır. Kapakcı: 1 nefer Yevmiyye 65 para 08 bahâ-yı nân +---- 73 07 bu def‘a zam +---- 80 Seksen paradır. Hamurkesen: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Yardımcı: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Pide açan: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Tırnakcı: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Bayatcı: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Destgâhdâr: 1 nefer Yevmiyye 180 para 020 bu def‘a zam +---- 200 İki yüz paradır. Kabbâncı: 1 nefer Yevmiyye 120 para 010 bu def‘a zam +---- 130 Yüz otuz paradır. Değirmen amelelerinin ücret-i kadîme ve bu def‘a tanzîm olunan ücretlerini mübeyyin defter. Reis: 1 nefer Yevmiyye 60 para 08 bahâ-yı nân +---- 68 07 bu def‘a zam +---- 75 Yetmiş beş paradır. Elekci: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Değirmenci: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Yardımcı: 1 nefer Yevmiyye 55 para 08 bahâ-yı nân +---- 63 07 bu def‘a zam +---- 70 Yetmiş paradır. Sayis: 1 nefer Yevmiyye 50 para 08 bahâ-yı nân +---- 58 07 bu def‘a zam +---- 65 Altmış beş paradır.