İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 247 Hüküm no: 110 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyük çarşının yangında yıkılan kemerlerinin keşfinin yapılması için çıkarılan emir Bâ-sahh-ı âlî. İstanbul kādısı fazîletlü efendi ve İhtisâb ağası ve Hâssa mi‘mâr ağa. Münhedim olan Çarşı-yı kebîr kemerlerinin keşfi’çün emr-i âlî. Bu def‘a bi-irâdetillâhî te‘âlâ vukū‘ bulan harîkde muhterik olan yorgancı ve yağlıkcı ve haffâf ve çadırcı ve abacı ve Batpazarı’nda kâin oturakcı ve Bezzâstân-ı atîk civârında vâki‘ zenneci ve kılabdancı ve şeritci ve kazzâz esnâfının emr-i ta‘ayyüşleri kendi ticâretlerine münhasır olduğuna binâen harîk vukū‘undan beri ticâretlerinden dûr olarak ıyâl ü evlâdlarıyla geçinmekde ıztırâb ve muzâyakaları derkâr ve bunların dükkânları Çarşı-yı kebîr’de olmak hasebiyle esnâ-yı harîkde ekser kemerleri münhedim olup bâkī kalanlar dahi çarçabuk ta‘mîr olunmadığı hâlde yağmur vukū‘unda külliyen münhedim olacağı bedîhî ve âşikâr olduğuna binâen zikrolunan dekâkîn mahalli ve kemerleri evvel emirde ma‘rifet-i şer‘le <> gereği gibi keşf ve mu‘âyene olunarak iktizâ eden mesârifi beher dükkânın zirâ‘ ve tahammülüne göre <> ashâbı taraflarından i‘tâ olunmak ve metîn ve rasîn olmak üzere olmak üzere binâ ve inşâ ettirilmesine müsâ‘ade-i seniyye erzânî kılınması husûsu esnâf-ı merkūme tarafından bâ-arzuhâl istid‘â ve istirhâm olunup istid‘â olunduğu vechile tanzîm olunması zımnında me’mûrlar tarafından zinhâr bir gûne tama‘ ve irtikâb misilli hâlet vukū‘a gelmemesi husûsuna irâde-i seniyye ta‘allukuyla ol bâbda hatt-ı hümâyûn-ı inâyet-makrûn-ı hazret-i pâdişâhî sahîfe-pîrâ-yı sudûr buyrulmuş olmakdan nâşî mantûk-ı münîfi üzere evvel emirde çarşı-yı mezkûrda lâzımü’l-inşâ olan kemerlerin ber-vech-i dikkat keşf ve mu‘âyenesiyle lâzım gelen mesârifâtı tedkīk ve hesâb olunarak ba‘dehû her bir dükkânın zirâ‘ ve tahammülüne göre > ashâbı taraflarından i‘tâ olunmak ve zinhâr kimesneye gadr ve te‘addî ve tama‘ ve irtikâb sûretleri vukū‘ bulmamak şartıyla ber-vech-i istid‘â metîn ve rasîn olarak inşâ ettirilmesi husûsuna mübâderet eyleyesin deyü. Fî 16 S sene [1]242.