İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 258 Hüküm no: 115 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı Hacı Mustafa Ağa vakfından Eminbey Mahallesi’ndeki arsanın bir kısmı ile Başdefterdar Seyyid Mehmed Tahir’e ait arsanın bir kısmının istibdali İstibdâl fermânı. Ma‘rûz. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în İstanbul kādısı Mevlânâ Abdurrahman zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki zikri âtî husûsun evvel emirde mahallinde lede’l-mu‘âyene keşf ve tahkīk ve tahrîri’çün cânib-i şer‘-i mutahhardan irsâl olunan kâtib es-Seyyid Mehmed Tahir zîde ilmuhû Hâssa mi‘mârı hulefâsından es-Seyyid Mehmed Nuri ve Derviş Ahmed ve Abdullah Halîfeler ile sen ki mevlânâ-yı mûmâ-ileyhsin nezâretinizde olan evkāfdan merhûm Kürkçübaşı el-Hâc Mustafa Ağa vakfı musakkafâtından İstanbul’da Destereciler kurbünde Eminbey Mahallesi’nde vâki‘ bir tarafdan Bezci Mustafa’nın oğlu Bakkāl Ahmed’in tasarrufunda olan muhterik menzil bahçesi ve verâsı ba‘zan Yağhâne sokağı demekle ma‘lûm tarîk-i hâs ve ba‘zan talebe-i ulûmdan Hamidli Mustafa menzili ve ba‘zan Çinici Mehmed İzzet’in muhterik menzil arsası ve bir tarafdan Ahmed Çavuş vakfından bi’l-fi‘l Başdefterdârım olan iftihârü’l-ümerâ ve’l-ekâbir es-Seyyid Mehmed Tahir dâme uluvvuhûnun tasarrufunda olan sedd-i bahçe ve ba‘zan Bevvâb-ı sultânî el-Hâc Hasan vakfından mûmâ-ileyhin tasarrufunda olan diğer bahçe ve taraf-ı râbi‘i tarîk-i âm ile mahdûd ve yine mûmâ-ileyhin bâ-temessük mütevellî bi’l-icâreteyn müstakillen mutasarrıf olduğu bir bâb arsaya varıp imâm-ı mahalle es-Seyyid el-Hâc Hüseyin b. es-Seyyid Mehmed ve el-Hâc Osman b. İbrahim ve Molla Mustafa b. Mustafa ve Ahmed b. el-Hâc İbrahim ve Dursun b. Ömer vesâir mazbûtü’l-esâmî Müslimîn huzûrunda akd-i meclis-i şer‘-i nebevî ettikde merhûm-ı mezbûr Kürkçübaşı el-Hâc Mustafa vakfının bâ-hüccet kāimmakām-ı mütevellîsi muhâsebe muhzırânından es-Seyyid Ahmed b. es-Seyyid İbrahim meclis-i ma‘kūd-ı mezkûrda Defterdâr-ı mûmâ-ileyhin kethüdâsı ve tarafından husûs-ı âti’l-beyânda vekîl olduğu Veliyüddin b. Halil ve İbrahim b. Yusuf nâm kimesneler şehâdetleriyle ber-nehc-i şer‘î sâbit olan el-Hâc Mehmed b. el-Hâc Ebûbekir mahzarında müvekkil-i mûmâ-ileyh işbu akd-i meclis-i şer‘-i âlî olunan arsadan zikrolunan tarîk-i hâssa mülâsık ve muhâzi olan lüzûmu mikdâr mahal ifrâz ve zikri âtî kendisinin müfrez mülk arsasıyla bi’l-istibdâl sokak küşâd olunarak tarîk-i hass-ı mezkûrun nâfiz ve vâsi‘ ve tarîk-i âm olması vücûhla umûr-ı hayriyyeden olduğuna binâen müvekkil-i mûmâ-ileyh ber-vech-i muharrer vakıf arsadan lüzûmu mikdâr arsa kendi mâlik olduğu mülk arsa ile istibdâl olunmasını murâd etmekle arsateyn-i mezbûreteyn keşf ve mesâha ve tahmîn olunup istibdâli cânib-i vakfa enfa‘ ise i‘lâm olunmak matlûbumdur dedikde evvelen mecmû‘-ı arsa-yı mevkūfe-i mezkûre mesâha olundukda tarîk-i âm tarafından arzen yirmi dört buçuk ve tûlen otuz üç buçuk zirâ‘ terbî‘an sekiz yüz yirmi bir zirâ‘a bâliğ olmağla tarîk-i hass-ı merkūmdan tarîk-i âmma gelince li-ecli’l-istibdâl ifrâz ve alâmât-ı fâsıla vaz‘ıyla imtiyâz olunan tûlen kezâlik otuz üç buçuk zirâ‘ ve arzen beş zirâ‘ terbî‘an yüz altmış yedi buçuk zirâ‘ mahallin beher zirâ‘ı dörder guruşdan altı yüz yetmiş guruşa resîde oldukdan sonra müvekkil-i mûmâ-ileyhin arsa-yı mevkūfe-i mezkûre karşısında vâki‘ Yahya Paşa sarayı demekle meşhûr tahdîd ve tavsîfden müstağnî evkāf-ı müte‘addide ile mahlût taht-ı tasarrufunda olan bir bâb muhterik menzil-i kebîrin arsa-yı mevkūfe-i mezbûre mukābilinde tarîk-i âmma küşâde kebîr sokak kapısının sol tarafında kâin bi-tarîkı’ş-şirâ bâ-hüccet müstakillen mâlik olduğu ma‘lûmü’l-hudûd ve’z-zirâ‘ arsa-yı vâsi‘adan ifrâz ve imtiyâz kılınan tarîk-i âm tarafından Çiftesu hazîneleri açıklığına varınca arzen on zirâ‘ ve tûlen yirmi zirâ‘ terbî‘an iki yüz zirâ‘ mülk arsanın beher zirâ‘ı beşer guruşdan bin guruş ve tarîk-i âm tarafında mevcûd arzen on zirâ‘ ve kadden on zirâ‘ terbî‘an yüz zirâ‘ kârgîr ana duvarın beher zirâ‘ı üçer guruşdan üç yüz guruş ki cem‘an mülk arsa ve kârgîr duvarın kıymeti bin üç yüz guruşa bâliğ olup ol vechile sâlifü’z-zikr iki yüz zirâ‘ arsa-yı memlûke-i müfreze mârru’z--zikr ifrâz olunan yüz altmış yedi buçuk zirâ‘ arsa-yı mevkūfeden vüs‘at ve rağbet ve ücret ve kıymet cihetlerinden ezyed ve evfer ve arsa-yı mevkūfe-i mezkûrenin ifrâzı vakfa muzır olmayıp istibdâli cânib-i vakfa enfa‘ ve evlâ olduğunu mi‘mârân-ı merkūmân vesâir ehl-i vukūf haber verdikleri inhâ olunmağla istibdâl-i mezkûra izin ve ruhsatı hâvî [44b] bâlâsı tuğra-yı garrâ ile mu‘anven bir kıt‘a emr-i şerîfim i‘tâsını i‘lâm etmekle i‘lamın mûcebince amel olunmak fermânım olmağın imdi senki mevlânâ-yı mûmâ-ileyhsin zikrolunan mülk arsa vakıf olan arsadan kıymet ve ücret ve rağbete ve mahallen ezyed ve evfer ve istibdâli cânib-i vakf-ı şerîfe evlâ ve enfa‘ olup şerâit-i istibdâl mevcûde olduğu i‘lâmın meâlinden müstebân olmağla istibdâli tecvîz eyleyen fukahâ-yı zevi’l-ibtihâcın kavilleri üzere vakıf arsa-yı mezkûre mülk ve mülk olan arsa vakıf olmak ve vakf-ı evvelin şürûtu vakf-ı sânîde icrâ olunmak üzere istibdâl edip tarafeyne hüccet-i şer‘iyye i‘tâsına mübâderet eylemen bâbında fermân-ı âlîşânım sâdır olmuşdur. Buyurdum ki hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket eyleyesin. Şöyle bilesin alâmet-i şerîfe i‘timâd kılasın. Tahrîren fî-evâili şehri Rebî‘i’l-evvel sene isnâ ve erba‘în ve mi’eteyn ve elf. Be-makām-ı Kostantıniyyeti’l-mahrûse. Mukābele şud.