İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 261 Hüküm no: 117 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır parasına benzer sahte paranın alış-verişte kesinlikle kullanılmaması ve yüz guruşluk ufak paraların da üç beş guruş eksiğine alınıp verilmesinin yasaklandığı Bâ-sahh-ı âlî. İstanbul kādısı fazîletlü efendi. Kalb para yasağı zımnında emr-i âlî. Sarraf esnâfı ve poliçeciler ve esnâf-ı sâire yedlerinde bulunan ufak para derûnunda külliyetli kalb para olduğundan başka esnâf-ı merkūmenin ahz u i‘tâlarında miyânelerinde tevârüd eden yüz guruşluk ufak parada üç beş guruş noksanıyla alınıp verilerek esnâf-ı merkūme beyninde bu fesâd bir nev‘ ticâret olmuş idiği mukaddemâ tahkīk olunup bu husûs mugāyir-i rızâ-i âlî olduğundan men‘i bâbında iktizâ edenlere hitâben beyaz üzerine fermân-ı âlî ısdârıyla tenbîh olunmuş ve bir müddet esnâf-ı merkūme memnû‘ olmuş ise de el-hâletü hâzihî usûl-i sâbık üzere yüz guruşluk ufak para üç dört guruş ve dahi ziyâde noksan olarak alınıp verilmekde olduğundan başka bu esnâda Mısır parasına şibh katî küllî kalb para tedâvül etmekde olduğu tahkīk olunup bu husûs bi’l-vücûh mugāyir-i rızâ-i âlî ve mukaddemâ vâki‘ olan tenbîhe münâfî olduğundan esnâf-ı merkūme bundan böyle o makūle yüz guruşluk parayı bilâ-noksân tamamıyla alıp vermeleri ve zikrolunan kalb parayı dahi zinhâr ahz u i‘tâ etmeleri ve bâ-irâde-i seniyye memnû‘ olan ecnâs altını dahi hafî ve celî beynlerinde alıp vermeyip Darbhâne-i âmireden memûr mübâya‘acılara fiyatıyla verilmesi ve ba‘d ez-în hilâfı hareket ederi olur ise bi’t-tahkīk ele geçenlerin icrâ-yı tedîbinde dakīka-i vâhide tehîr ve müsâmaha olunmayacağı husûsları irâde olunarak keyfiyet bu def‘a iktizâ edenlere hitâben başka başka beyaz üzerine fermân-ı âlî ısdârıyla tenbîh olunmuş olmağla imdi siz dahi bi’l-cümle esnâf kethüdâlarını huzûrunuza celb ile ba‘de ez-în hilâf-ı emr ve tenbîh hareket ederi olur ise bi’t-tahkīk ele geçenlerinin icrâ-yı tedîb ve tekdîrlerinde dakīka-i vâhide tehîr ve müsâmaha olunmayacağını gûş-ı hûşlarına tebyîn ve telkīne mübâderet-birle icrâ-yı emr ü irâdeye sarf-ı makderet eyleyesin deyü. Fî 19 min Ca sene 1242.