İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 262 Hüküm no: 118 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanmış olan Mahmudpaşa Mahkemesi sicillerinin yeniden oluşturulması için kimin elinde vakfiye, sened ve sair kayıt varsa mahkemeye götürmeleri emri Bâ-sahh-ı âlî. İstanbul kādısı fazîletlü efendi. Muhterik olan Mahmud Paşa mahkemesinin senedâtı müceddeden mahkeme-i mezbûra kaydolunması bâbında emr-i âlî. Bi-kazâillâhî te‘âlâ bundan akdem Dersa‘âdet’de vukū‘ bulan harîkde Mahmud Paşa Mahkemesi ve sicillâtı külliyen muhterik olup lede’l-iktizâ mürâca‘at olunmak üzere mahkeme-i mezbûrede müceddeden sicil tertîbi ibâdullâha elzem ve enfa‘ olmakdan nâşî mahkeme-i mezbûrede tahrîr olunup derdest olan vakfiye vesâir senedâtın müceddeden tertîb olunan sicille kaydı’çün ashâb-ı taraflarından bir akçe ve bir habbe alınmamak üzere o makūle vakfiye ve senedât meccânen kayd ve sebt olunması irâde olunarak keyfiyet zîr-i hükûmetlerinde olan mahallât imâmlarına tenbîh eylemeleri Bilâd-ı selâse ve kādıları efendilere hitâben beyaz üzerine başka başka fermân-ı âlî ısdârıyla tenbîh olunmuş olmağla imdi siz dahi keyfiyeti İstanbul’da vâki‘ mahallât imâmlarını celb ile herkes yedlerinde mevcûd vakfiye ve senedâtı mahkeme-i mezbûreye götürüp kayd ve sebt ettirmelerini etrâfıyla tenbîh ve tekîde mübâderet eyleyesin deyü. Fî 20 Ra sene 1242.