İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 263 Hüküm no: 119 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’da Yağcı esnafı İbrahim’in yağcı gediğinin zayi olan hüccetinin çıkarılması talebi Galata’da yağcı gediğinin zâyi‘ olan hücceti ihrâcı bâbında ilmühaber. İbrahim nâm kimesnenin takdîm eylediği bir kıt‘a arzuhâli mefhûmunda mahrûse-i Galata’da yağcı esnâfından olup zarûret ve muzâyakası hasebiyle mukaddemâ miyâne-i merfû‘adan dokuzuncu cemâ‘atin miyânesinden iki bin guruş istikrâz ederek mukābelesinde mutasarrıf olduğu bir bâb dükkânın gedik ve mülk hüccetleriye senedât-ı sâiresini rehin vaz‘ etmiş olduğundan bahisle deyni olan meblağ-ı mezkûru cânib-i mîrîye ba‘de’t-teslîm zikrolunan senedâtlarının i‘tâsı husûsunu istid‘â etmekden nâşî merkūmun zimmeti kaydı muhallefâtdan ve mahrûse-i merkūmede iki aded yağcı mahzenleri ve dükkânlarına mülk ashâbı taraflarından ziyâde kirâ mutâlebesiyle gedikleri mu‘attal kalmış ve ba‘d ez-în ziyâde mutâlebe olunmamak üzere mutasarrıfları yedlerine sûretleri verilmiş ve dükkân-ı mezkûrun gediği’çün sâhib-i merkūm yedine sûret verildiğinin kaydı bulunamamış idiği Başmuhâsebe’den ba‘de’l-ihrâc cemâ‘at-i mezkûrun rehin ve temessükâtı sandığı muhterik olmuş olduğundan istid‘â olunan senedâtın kaydı ihrâc olunmak üzere İstanbul Mahkemesi sicillâtına lede’l-havâle mahrûse-i merkūme Yağkapanı tüccârından Hüseyin Ağa b. Kilisli el-Hâc İsmail Ağa’nın beyne’l-esnâf gedik tâ‘bir olunur âlât-ı lâzıme-i ma‘lûmeyi hâvî taht-ı tasarrufunda olan bir bâb yağcı dükkânının bedel-i ma‘lûm mukābili merkūm İbrahim ile es-Seyyid Ahmed Ağa’ya fürûht ederek onlar dahi ber-vech-i münâsafa iştirâ ederek zabt ve tasarrufları’çün başka ve ba‘dehû dükkân-ı mezkûrun hissedârı olan merkūm Ahmed mutasarrıf olduğu nısf hissesini müştereki olan merkūm İbrahim’e bedel-i ma‘lûm mukābili fürûht etmiş ve hisse-i mezkûrda kat‘â alâkası kalmamış olduğundan dükkân-ı mezkûr müstakillen merkūm İbrahim’in mülk-i müşterâsı ve hakk-ı sarîhi olduğunu mübeyyin başka iki kıt‘a hüccet-i şer‘iyye i‘tâ olunmuş <> idiği ba‘de’l-ihrâc hüccet-i mezkûre muhterik olduğu haber verilmekle merkūmun deyni Mukâta‘ât hazînesine ba‘de’t-teslîm zâyi‘den hücceti tahrîr olmak üzere sicillâta ilmühaberi verilmek fermân buyrulmağın mûcebince kaydolunup merkūmun deyni olan meblağ-ı mezbûr iki bin guruş tamamen tahsîl ve hazîne-i mezkûreye teslîm olunduğu Sergi defterleri’nden işâret olunarak senedi i‘tâ olunmuş olduğundan sâlifü’l-beyân dükkân-ı mezkûr zımnında mukaddemâ tanzîm kılınmış olan hüccetinin kaydı mûcebince zâyi‘den i‘tâsı’çün İstanbul kādısı fazîletlü efendi hazretleri sicillâtı tarafına işbu ilmühaber kāimesi verilmişdir. Fî 20 min Ca sene 1242. İşbu ilmühaberde mastûr iki kıt‘a hüccetin biri fî-6 M 234 târihinde ve biri fî-27 Ş Sene 235 târihlerinde Vekāyi‘ hüccet sicillinde mukayyed ve mastûrdur.