İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 264 Hüküm no: 120 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcı esnafının bulunduğu dükkânların bir başkasına satılmaması emri Çadırcı esnâfının gediklerine dâir ilmühaberdir. Mehterhâne-i âmireye mülhak olan otuz beş aded dükkândan ibâret olan çadırcı esnâfının mutasarrıf oldukları dükkânlarının gedikleri ötedenberü ecânibden kimesneye fürûht olunmayıp sagīrcesi kırkar ve kebîrcesi seksener guruşa beyne’l-esnâf bir birlerine fürûht ede gelmişler ise de bu def‘a sandıkcı esnâfı dükkânları gedikleri başka mahalle naklolunarak dekâkîn-i mezkûre fincancı esnâfına verilmesi cihetiyle çadırcı esnâfından birkaç nefer kimesne tama‘ ve irtikâblarına mebnî dükkânlarının gediklerini gālî bahâ ile ecânibden kimesnelere fürûht etmek sevdâsında olduklarından ve bunların dükkânlarından âhar esnâfa fürûht olunmak lâzım gelse esnâfın noksanına ve mühimmât-ı hıyâm maslahatının ta‘tîline bâdî olacağından bahisle esnâf-ı mezkûrenin dükkânları âhara fürûht olunmayıp kadîmi vechile birbirlerine fürûht olunmak üzere Başmuhâsebe’ye kayd ile iktizâ eden mahallere ilmühaberleri i‘tâ olunmasını Çadırcıbaşı ve esnâf-ı merkūme kethüdâsı bâ-arzuhâl istid‘â etmeleriyle kuyûda mürâca‘at olundukda esnâf-ı merkūmenin Mehterhâne-i âmirede inşâ eyledikleri mühimmât-ı hıyâmdan mu‘ayyen olan ücret ve yevmiyye-i maktû‘ları vakt ü hâle nazaran kadr-i kifâyeden dûn olduğuna ve ta‘ayyüşleri buna münhasır idiğine mebnî yevmiyye-i maktû‘alarına birer mikdâr zam olunması esnâf-ı merkūme tarafından mukaddemâ bâ-arzuhâl lede’l-istid‘â yevmiyye ve ücret-i maktû‘larının rub‘u zammolunarak iki yüz otuz yedi târihinde esnâf-ı merkūme yedine sûreti ve Mehterhâne-i âmireye ilmühaberi verildiği mukayyed olup ancak esnâf-ı merkūmenin gediklerine dâir ve nizâm-ı sâirelerine mütedâir kayd bulunmadığı ba‘de’l-ihrâc iktizâsı i‘lâm eylemek üzere Mehterhâne-i âmire nâzırı atûfetlü efendi hazretlerine lede’l-havâle mühimmât-ı hıyâmın kat‘ ve i‘mâli esnâf-ı merkūmeye mahsûs olup dükkânları dahi cüz’iyât makūlesi olduğundan ve perdeci ve çadırcı başılar ve esnâf kethüdâsı ser-neverdi ve yiğitbaşı nâmıyla beş nefer zâbitân gedikleri Mehterhâne-i âmire tarafından arza bâ-ru’ûs-ı hümâyun tevcîh ve hizmet-i mezkûrede el-yevm istihdâm olunmakda olduklarından ve livâ-i şerîf ve seraskerân takımları ve bâ-husûs Asâkir-i mansûre için inşâsı irâde buyrulan çadırların sür‘at-ı inşâsı lâzımeden olduğuna mebnî mezkûr dükkân gedikleri âhara fürûht olunduğu sûretde esnâf-ı merkūmeye kıllet geleceği zâhir ve ol vechile mühimmât-ı hıyâmın sür‘at-ı i‘mâline sekte ve halel tatarruk edeceği bâhir olduğundan umûr-ı mehâmm-ı saltanat-ı seniyyeyi ta‘tîlden vikāyeten esnâf-ı mezkûreye mahsûs dükkânlar ecânibden kimesneye fürûht olunmayıp mine’l-kadîm olageldiği vechile bir birlerine fürûht olunmak üzere tanzîmine irâde-i aliyye buyrulur ise Başmuhâsebe’ye kayd ve îcâb eden mahallere ilmühaberlerinin i‘tâsı lâzım geleceğini i‘lâm etmekle ber-mûceb-i i‘lâm tanzîm olunmak bâbında sâdır olan fermân-ı âlî mûcebince Başmuhâsebe’ye kayd <> olunup iktizâ eden mahallere ilmühaberleri verilmek fermân buyrulmağın mûcebince kaydolunup İhtisâb ağasına ve Haremeyn müfettişi efendi hazretlerine ve Mehterhâne-i âmire ve Rûznâmçesine ve esnâf tarafına ve Ayasofya-i kebîr vakfı tarafına başka başka ilmühaberleri verilmekle ber-minvâl muharrer keyfiyet ma‘lûm olmak için İstanbul kādısı fazîletlü semâhatlü efendi hazretleri tarafına dahi işbu ilmühaber kāimesi verildi. Fî 7 C sene 1242.