İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 266 Hüküm no: 122 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i Mansûre için gerekli olan mum Asâkir-i Mansûre-i Muhammediye’ye verilecek şem‘-i revgan ilmühaberi. Asâkir-i mansûre nâzırı atûfetlü efendi hazretlerinin takdîm eylediği takrîri mefhûmunda mumcu esnâfı cânibinden mülgā Yeniçeriocağı tarafına şem‘-i revgan verilegeldiği ma‘lûm ise de keyfiyeti bilinmek ve Askâr-i Mansûre-i Muhammediye’ye muktezî olan şem‘-i revganın hüsn-i nizâmı müzâkere olunmak üzere İhtisâb ağası Mustafa Ağa ve esnâf-ı merkūmenin kethüdâ ve ihtiyârlarını celb ile lede’l-müzâkere ocağ-ı mezbûr tarafından mâhiye altı yüz elli sekiz vakıyye şem‘-i revgan alınıp beher kıyyede yedişer para bedel i‘tâ ede gelmişler ise de tâife-i merkūmenin tasallutları ma‘lûm ve hamden lillâhi te‘âlâ sâye-i merâhim-vâye-i pâdişâhîde âsâyiş ve rahat husûlü emr-i meczûm olduğundan Asâkir-i mansûre için bilâ-bedel dört yüz vakıyye şem‘-i revgan i‘tâ edeceklerini ve Tophâne-i âmire tarafına bedel-i mezkûr ile veregeldiklerini yirmi dokuz buçuk vakıyye şem‘-i revganı dahi kemâ-kân vereceklerini beyân ve tezkâr etmiş olduklarından bahisle ber-vech-i muharrer ifâde ve inhâları üzere bilâ-bedel dört yüz vakıyye şem‘-i revgan verilmesi yâhud mukaddemâ ocağ-ı mezbûr tarafından alınageldiği misilli bedel-i mezkûr ile altı yüz elli sekiz vakıyye şem‘-i revgan tamamen i‘tâ eylemeleri şıklarından kangısı muvâfık-ı irâde-i seniyyeleri buyrulur ise Başmuhâsebe’ye kayd ile İstanbul Bâb Mahkemesi’ne ve İhtisâb ağası mûmâ-ileyh ve kendi tarafına başka başka ilmühaberleri i‘tâsı husûsunu inhâ etmekle kangı sûretde tanzîmi mîrîye enfa‘ ise ol vechile iktizâ-yı nizâmına mübâderet olunmak bâbında sâdır olan fermân-ı âlî mûcebince kuyûda lede’l-mürâca‘a Tophâne-i âmire kışlası derûnunda kâin merhûm ve mağfûrun-leh Sultan Süleyman Hân tâbe serâhu hazretlerinin binâ ve ihyâ eyledikleri câmi‘-i şerîfin hîn-i inşâsında topçubaşı bulunan kimesne câmi‘-i şerîf-i mezkûra ba‘zı musakkafât tanzîm ve ondan sonra nasb olunan topçubaşılardan ba‘zıları dahi yine câmi‘-i mezkûra musakkafât ilâve edip câmi‘-i mezkûrun hîn-i inşâsında topçuların birinci odası mevcûd olmak takrîbiyle beher kıyyesi yirmi ikişer akçeye olmak üzere mâhiye otuz vakıyye mum bahâsı olarak beş buçuk guruş hâsılât vakıfdan ta‘yîn olunarak mütevellîleri tarafından verilmekde olduğu ve verilen şem‘-i revgandan birinci kışlasına ve câmi‘-i şerîf ve Tophâne-i âmirede leylen geşt ü güzâr eden kollar zâbitânın fenerlerine verilip bu vechile idâre oluna geldiği Topçular kâtibi efendi cerîdesinden derkenâr olunmağla bu sûretde bilâ-bedel mum alınması eğerçi mîrîye enfa‘ görünür ise de Tophâne-i âmireye dahi ol mikdâr mum verileceğinden mâ‘adâ terkīm ettirilen pusula mantûkunca ocağ-ı mülgā tarafına verildiği misilli yedişer para bedel ile altı yüz elli sekiz vakıyye mum verildiği hâlde bilâ- bedel verilecek dört yüz vakıyyeden mâ‘adâ iki yüz elli sekiz vakıyye mumun bahâsından yüz doksan dört guruş sa‘y-i mîrî olacağı ecilden bu takdîrce mezkûr ol mikdâr bedel ile şehriye altı yüz elli sekiz vakıyye mum verilmek üzere tanzîmi muvâfık-ı irâde-i seniyyeleri ise ol vechile Başmuhâsebe’ye kayd ile iktizâ eden mahallere ilmühaberleri i‘tâsı menût-ı re’y-i sâmî idiği bâ-takrîr lede’l-arz mûcebince kayd ile iktizâ eden mahallere ilmühaberleri i‘tâsıyla tanzîm olunmak bâbında sâdır olan fermân-ı âlî mûcebince kaydolunup iktizâ eden mahallere başka başka ilmühaberleri verilmekle İstanbul Bâb Mahkemesi’ne dahi işbu ilmühaber verildi. Fî gurreti Recebi’l-ferd sene 1242.