İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 271 Hüküm no: 125 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sıvacı ve nakkâş esnafının birbirlerinin işlerini yapmalarına izin verildiği Bâ-sahh-ı âlî. İstanbul kādısı fazîletlü efendi. Sıvacı ve nakkāş esnâfının inhisâr maddelerinin men‘i bâbında emr-i âlîdir. Ebniye-i mîrîye ve ibâdullâh ebniyelerinde müstahdem Müslim ve ehl-i zimmet sıvacıların içlerinde hünerlileri sıva üzerine yağlıboya boyamak husûsu bundan akdem bâ-fermân-ı âlî ruhsat verilip ol vechile karâr-gîr olmuş ise de inşâ olunan ebniyelerde nakkāşlık husûsu yalnız ehl-i İslâma münhasır olmuş olduğundan istedikleri gibi kat‘-ı fiyat ederek gālî bahâ ile ebniye-i mîrîye ve ibâdullâh binâlarında bir nev‘ hasârı mûcib olduğundan başka esnâf-ı mezkûreden mâ‘adâ nakkāşlık fennini bilir âhar kimesne istihdâm ettirilmek murâd olunsa nakkāşlık san‘atı kendilere inhisâr ederek dâimâ men‘ etmekde iseler de işbu inhisâr maddesi ötedenberü mugāyir-i irâde olduğundan fîmâ ba‘d sıvacı esnâfı içinde nakkāşlık san‘atını bilenler nakkāşlık ve nakkāş esnâfında sıvacılık san‘atını bilenler sıvacılık işlemek ve inhisârdan kurtarılmak için birbirlerinin san‘atlarını işleyip bir vechile yekdiğere müdâhale etmemeleri husûsunu esnâf-ı merkūmeye tenbîh eylemeleri Şehremîni efendi ve Hâssa mi‘mârı ağaya bu def‘a beyaz üzerine fermân-ı âlî ısdârıyla tenbîh ve tekîd olunmuş olmağla siz dahi bu husûsu sicille kayd ile keyfiyeti iktizâ edenlere tenbîhe mübâderet eylesin deyü buyruldu. Fî 25 B sene 1242.