İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 272 Hüküm no: 126 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da çarşı, pazar ve sokakların on beş günde bir temizlenmesi emir Bâ-sahh-ı âlî. İstanbul kādısı fazîletlü efendi ve İhtisâb ağası. Süpründü tathîri için fermân-ı âlîdir. Dersa‘âdet sokakları has ü hâşâk ile mülevves olarak ta‘affünât zuhûruyla ümmet-i Muhammed müteezzî olmakda olduğuna binâen aralık aralık süpürülüp tathîr olunması lâzımeden ve nezâfet kabîlinden olup herkes hânesi ve dükkânları önlerini ve bâ-husûs çarşı derûnunu süpürüp has ü hâşâkdan tathîr ve tanzîf eylemesi lâzım gelmiş ve bu husûs iktizâ edenlere fermân-ı âlî ısdârıyla başka başka tenbîh ve tekîd olunmuş olmağla imdi siz dahi herkes hâne ve dükkânları önlerini tathîr eylemesi ve her kimin hâne ve dükkânı önünde mezbele ve süpründü görülür ise tedîb olunacaklarını bi’l-cümle esvâk ve pazar ve mahallât ahâlîsine ismâ‘ ve ihbâr ile fîmâ ba‘d çarşı ve pazar ve mahallât aralarında mezbele ve süpründü bırağılmayarak götürüp bahre ilkā ile ale’d-devâm bu maddeye tarafınızdan nezâret ve dikkat ile on beş günde bir bu vechile esvâk ve pazarın tathîr eylemelerini iktizâ edenlere ekîden tenbîhe himmet ve hilâfı hareket edenler olur ise o makūlelerin tedîb ve gûşmâlleri icrâ olunacağını gûş-ı hûşlarına tefhîm ve ol vechile on beş günde bir kerre tathîrine dikkat eylemeleri husûsuna siz dahi bizzât nezârete mübâderet eyleyesin deyü. Fî 8 Ş sene 1242.