İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 272 Hüküm no: 127 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Surre olarak Mekke ve Medine’ye gönderilecek olan torba ve mektupların içerisine ağır bir şey konulmaması emri Bâ-sahh-ı âlî. İstanbul kādısı fazîletlü efendi. Surre mektûbları zımnında emr-i âlî. Mekke-i mükerreme ve Medîne-i münevvere ahâlîleri tarafına beher sene Dersa‘âdet’den irsâl olunmakda olan surre mektûbları ve ol tarafdan gönderilen cevâbnâmeleri kemâ-hiye hakkuhâ ashâbı câniblerine vâsıl olamayarak karışıklık vukū‘a gelmesi Müjdecibaşıların tam‘an ziyâde eşyâ alarak esnâ-yı râhda idâreye muvaffak olamamalarından neş’et etmiş olduğundan başka ba‘zı bu tarafdan gönderilen tobralara dahi haml-i sakīl eşyâ vaz‘ olunduğu haber verilmiş ve bu maddenin bir hüsn-i nizâma rabt ve tevsîkiyle ahâlî-i Beldeteyn-i mükerremeteyn’in medâr-ı ta‘ayyüşleri olan surreleri ve mücâvirîn emânetlerinin telefden vikāyesi lâzım gelmiş olduğundan fîmâ ba‘d Mekke-i mükerreme ve Medîne-i münevvere’ye gidecek mekâtib ve emânet tobraları Şa‘bân-ı şerîfin on beşinci gününden bede’ ile gurre-i Ramazan-ı şerîf’e kadar on beş gün müddet ta‘yîn ile a‘lâ ve ednâ her kim olur ise olsun tobra ve mektûblarını Haremeyn muhâsebesi kalemi’ne götürüp ve gönderip Müjdecibaşılar hâzır oldukları hâlde bizzât Haremeyn muhâsebecisi efendi nezâret ederek tobralarda mekâtibden mâ‘adâ haml-i sakīl olmayıp cüz’î hediyeler ibkā ve mest ve papuç ve câmeşûy ve emti‘a-i sâire o makūle eşyâ olduğu hissolunan tobralar kabûl olunmayıp asbâhıbına red ve i‘tâ olunmak üzere mukaddemâ bâ-irâde-i seniyye karâr verilmiş ise de şimdiye kadar Haremeyn muhâsebesi kalemi’ne gelen mekâtib ve tobralar cüz’î olduğu istihbâr ve tahkīk olunmuş olup el-hâletü hâzihî Şa‘bân-ı şerîfin yirmisi gelmiş olduğuna ve Müjdecibaşıların dahi Ramazan-ı şerîf gurresinde hareket ve azîmetleri lâzımeden idiğine mebnî ashâb-ı mekâtib bir an akdem tobra ve mektûblarını Haremeyn muhâsebesi kalemi’ne götürmeleri lâzım gelmiş olmağla imdi Ramazan-ı şerîfe kadar herkes mektûb ve tobralarını Haremeyn muhâsebesi kalemi’ne götürüp teslîm etmek üzere keyfiyeti mahalleleri ahâlîsine ifâde ve i‘lân eylemelerini bi’l-cümle mahallât imâmlarını nezdinize celb ile tenbîh ve tekîde mübâderet eyleyesin deyü. Fî 18 Ş sene 1242.