İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 289 Hüküm no: 135 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri kışlalarından Şehzâdebaşı’nda bulunan Yeniodalar’a Ahmediye ve Eskiodalar’a Fevziyye isminin verildiği Eski ve Yeni odalar tâ‘bir olunan mahâll-i mülgāya Fevziyye ve Ahmediye tesmiye olunduğuna dâir ilmühaberdir. Şehzâdebaşı’nda kâin Eski odalar ve Sultanmehmed civârında Yeni odalar tâ‘bir olunan mülgā makhûrların münhedim ve muhterik kışlaklar fi’l-asl emlâk-i hümâyûn olarak mahallât dâhilinde olmadığına ve bi-tevfīkillâhi te‘âlâ kışlak lafzı lagv ve mahv olunarak müceddeden menâzil ve dekâkîn inşâ olunacağına binâen münâsib birer isim tesmiye olunarak ve civârlarında kâin selâtîn ve mahallât cevâmi‘-i şerîflerinden birine ilhâk veyâhud civâr ve münâsiblerine göre hudûd ta‘yîniyle taksîmi ve Eski odalar tâ‘bir olunan kışlak-ı mehdûme mahalline Fevziyye ve Mansûriyye ve Yeni odalar tâ‘bir olunan muhterik kışlak mahalli bütün bütün Sultan Ahmed Hân tâbe serâhu hazretleri vakf-ı şerîfine tashîh [tahsis] olunacağından Ahmediye veyâhud âhar münâsib birer isim tesmiye kılınması husûslarında ne vechile irâde-i seniyye ta‘alluk eder ise ol vechile ma‘rifet-i şer‘le tanzîm ve tescîl olunması’çün fazîletlü İstanbul kādısı efendi hazretleri tarafına ilmühaberi i‘tâsı husûsu husûsât-ı sâireyi şâmil sekiz bend bir kıt‘a takrîrleriyle lede’l-arz takrîr-i mezkûr bâlâsına midâd-ı sürhle işâret olunarak taraf-ı hazret-i sadâret-penâhîden rikāb-ı hümâyûn-ı mülûkâneye lede’l-arz ve Eski ve Yeni tâ‘bir olunan mahallerin eskisine Fevziyye ve yenisine Ahmediye tesmiye olunmak mazmûnunda hatt-ı şerîf-i şâhâne şeref-rîz-i sudûr olmağla mantûk-ı münîfi icrâ olunmak bâbında sâdır olan fermân-ı âlî mûcebince isim maddesi tanzîm olunmuş olmağla zikrolunan Ahmediye ve Fevziyye nâm mahallerin civârlarında kâin selâtîn ve mahallât cevâmi‘-i şerîflerinden birine ilhâk veyâhud civâr ve münâsiblerine hudûd ta‘yîniyle taksîm ve ol vechile ma‘rifet-i şer‘le tescîl olunması’çün Başmuhâsebe’ye kaydolunup fazîletlü İstanbul kādısı efendi hazretleri tarafına işbu ilmühaber verildi. Fî 12 Ş sene 1242.