İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 290 Hüküm no: 136 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da satılacak olan kuzu eti narhı Bâ-sahh-ı âlî. İstanbul kādısı fazîletlü efendi. Kuzu narhı. Dersa‘âdetimde mutavattın ibâdullâhın tevsî‘-i dâire-i ta‘ayyüşleriyle ezher cihet zarûretden vikāyetleri matlûb olup el-hâletü hâzihî Rûz-ı Hızır takarrüb etmekde idiğine ve lillâhi’l-hamd bu sene-i mübârekede kuzunun vefret üzere idiği mesmû‘ olduğuna binâen Rumeli ve Anadolu taraflarından ve civâr-ı saltanat-ı seniyyede kâin ba‘zı çiftlik ve mandıralardan <> vürûd edecek kuzuların cümlesi doğru Yedikule’ye sevk olunup ta‘ahhüd olunduğu üzere ashâbı beher vakıyyesini kasab esnâfına sene-i sâbıkı misilli otuz üçer paraya vermek ve kasablar dahi ikişer para ticâret zammıyla otuz beşer paraya ibâdullâha bey‘ etmek üzere nizâma rabt olunmuş olduğundan bi-mennihî te‘âlâ vakti hulûlünde fiyat-ı mezkûre üzere bey‘ ve fürûht ettirilmesi husûsu tarafınızdan i‘lâm olunmuş ve keyfiyet Rikāb-ı hümâyûn-ı hazret-i pâdişâhîye lede’l-arz ol vechile tanzîmi husûsuna irâde-i mülûkâne ta‘allukuyla hatt-ı hümâyûn-ı şâhâne şeref-rîz-i sudûr olunmuş olmakdan nâşî hiç ferdin ayakdan kuzu fürûht etmemesi ve köşebaşlarında ve kasab dükkânlarında kuzu zebh olunmayıp hilâfına cesâret ederi olur ise o makūlelerin kuzuları mahâll-i tevzî‘a sevk olunması husûsları Hâssa kasabbaşısı ile sâir iktizâ edenler îcâbı vechile tenbîh ve beyân kılınmış olmağla imdi siz dahi lâzım gelenleri nezdinize celb ederek tâife-i kassabânın narh-ı cârîden bir akçe ziyâdeye kuzu bey‘ ve fürûht etmemek ve dükkânlarında dahi kuzu zebh eylememek üzere sûret-i irâdeyi ifâdeye mübâderet ve hilâfı cesâret ederi olur ise tedîb olunacaklarını tefhîme dikkat-birle işbu nizâmın düstûrü’l-amel tutulması esbâbını istihsâle dikkat eylesin deyü buyruldu. Fî 6 min N sene 1242.