|
İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 291 Hüküm no: 137 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Asâkir-i Muhammediye’nin hastaları için alınacak francala ekmeğinin fiyat ve kalitesine ilişkin ilmühaber
Asâkir-i Muhammediye’nin me’kûlâtları olan francalaya dâir ilmühaberdir.
Asâkir-i Mansûre-i Muhammediye hastalarının me’kûlâtları’çün müteferrik mahallerden mübâya‘a olunan francalanın sikkesi dûn ve nisâbında pişkin olmadığı rû-nümûn ve zikrolunan hastaların me’kûlâtlarına dikkat ve ri‘âyet farîza-i zimmet-i vâcibe-i uhde-i ubûdiyyetim olduğu ta‘rîfden bîrûn olmağla fîmâ ba‘d sâlifü’z-zikr francalanın emsâli sikkesinden hâs ve a‘lâ ve nisâbında pişkin ve dolu olmak ve sa‘y-i mîrî farîzasına ri‘âyeten narh-ı cârîsinden beher kıyyesinde ikişer para tenzîliyle bey‘ ve fürûht etmek ve mâh be-mâh iktizâ eden bahâsı emsâlinden olan habbâz misilli makbûz-ı senedâtı kalemine ba‘de’t-teslîm ol vechile hesâb ve i‘tâ kılınmak üzere Yedikule hâricinde vâki‘ francalacı ustası ta‘ahhüd etmiş ve husûs-ı mezkûr Asâkir-i Mansûre nâzırı sa‘âdetlü atûfetlü efendi hazretleriyle müzâkere ve karâr verilmiş idiğinden bahisle iktizâsı efendi-i mûmâ-ileyh hazretlerinden ba‘de’l-isti‘lâm mûcebince şerâit-i lâzıme ve vesâyâ-yı sâiresi derciyle francalacı ustası yedine sûret i‘tâsıyla tanzîmi husûsunu Zahîre nâzırı sa‘âdetlü atûfetlü efendi hazretleri lede’l-inhâ iktizâ-yı hüsn-i nizâmı sa‘âdetlü Asâkir-i Mansûre nâzırı efendi hazretlerinden lede’l-isti‘lâm Asâkir-i Mansûre-i Muhammedi’ye hastaları me’kûlatları vâcibü’l-i‘tinâ mevâddan ve ekl edecekleri francalaların emsâli sikkesinden hâs ve a‘lâ ve nisâbında pişkin olması lâzımeden olduğundan başka narh-ı cârîsi olan yirmi sekiz paradan ikişer para tenzîliyle bey‘ olunduğu sûretde menfa‘at-ı mîrîyeyi müstelzim olacağı rû-nümûn olmak mülâbesesiyle ber-mûceb-i takrîr tanzîmi menût-ı irâde-i aliyye idiğini memhûren i‘lâm etmekle bâ-takrîr lede’l-arz mûcebince sûret ve İstanbul Mahkemesi’ne ve İhtisâb tarafına başka başka ilmühaberleri verile deyü fermân-ı âlî ve fermân-ı şerîf sâdır olmağın mûcebince mahalline kaydolunup İhtisâb tarafına başka ilmühaberi verilmiş olmağla keyfiyet ma‘lûm olmak için İstanbul Mahkemesi tarafına Navul kalemi’nden işbu ilmühaber verildi.
Fî 5 min-L sene 1242.
|