İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 291 Hüküm no: 138 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mahalle imamlarının ölen herkesi isim ve şöhretini belirterek defterdara haber verecekleri
Bâ-sahh-ı âlî.
İstanbul kādısı fazîletlü efendi.
Eshâm ve mukāta‘a mahlûlâtının ihbâriyesine dâir emr-i âlîdir.
Ricâl ve nisvâna ber-vech-i mâlikâne fürûht olunu gelen envâ‘-ı eshâmın ve yalnız zecriye rüsûmundan milel-i selâseye verilügelen eshâmın şürût-ı mer‘iyye-i mîriyye üzere mahlûlâtın râci‘ olduğu mahallere zabt olunması husûsunda kemâliyle taharrî olunmakda ise de hasbe’l-iktizâ eshâmın kesret üzere fürûhtu takrîbiyle idâresi müte‘assir ve eshâmı olan ricâl ve nisvândan ba‘zıları kenar mahallerde bulunmak hasebiyle mahlûlâtı haber alınamayarak aralıkda hasâr-ı mîrî vukū‘a gelmeden nâşî Askerî kassâmı efendi tarafından ricâl ve nisvândan ne mikdâr muhallefât tahrîr olunur ise beher-mâh esâmî ve şöhretleri ve sâkin ve sâkine oldukları mahalleri tasrîhiyle defterleri tanzîm ve izzetlü Defterdâr efendi tarafına irsâl ile üzerlerinde eshâm ve mukāta‘ât var ise kalemlerinden tahkīk ve mahlûle zabt olunmak üzere mûmâ-ileyh Kassâm efendi tarafına başka ve eshâm-ı mahlûlenin ihbâriyesi cânib-i mîrîden verilügelmekle Dersa‘âdet ve civârında vâki‘ Haslar ve Galata ve Üsküdar ve tevâbi‘âtında sâkin ve sâkine ricâl ve nisvândan fevt olanların tereke ve ba‘zı husûsları vukū‘unda taharrî olunmak için kezâlik isim ve şöhreti beyân ve defter olunarak cânib-i mîrîye ihbâr eylemeleri lâzım gelenlere tenbîh olunmak üzere bundan akdem iktizâ edenlere başka başka beyaz üzerine fermân-ı âlî ısdârıyla tenbîh ve muahharan tekîd olunmuş ve İstanbul ve tevâbi‘i Emti‘a gümrüğü mülhakātından olan Beytülmâl-ı âmme ve hâssa mukāta‘ası gümrük-i mezbûrdan fek ile cânib-i mîrîden zabt ve idâre ve defterdâr-ı vakt bulunanlar taraflarından rü’yet olunmak üzere tanzîmine irâde-i seniyye ta‘alluk ederek bilâ-vâris-i ma‘rûf fevt olan vâris-i gāib olarak vefât edenleri ihbâr eylemeleri’çün bi’l-cümle mahallât imâmlarına tenbîh olunmak üzere kezâlik fermân-ı âlî ısdârıyla iktizâ edenlere tenbîh ve lâzım gelen mahallere ilmühaberleri i‘tâ kılınmış ve ol vechile mûmâ-ileyh Kassâm efendi ve mehâkim-i sâireden bir müddet defterler gönderilerek nizâm-ı mezkûr icrâ olunmuş ise de ba‘dehû terk olunarak meskûtün-anh kalmış olduğuna ve eshâmın kesretine ve vukū‘ bulan mahlûlâta nazaran mahlûlât lâyıkıyla haber alınamayarak mektûm kalmak ihtimâlinden gayr-ı ba‘îd idiğine binâen fîmâ ba‘d eshâm-ı mahlûle için cânib-i mîrîden verilügelen ihbârıyla âhar kimesnelere verilmeyip bi’l-cümle mahallât imâmlarına tahsîs kılınarak Dersa‘âdet ve havâlîsinde olan Eyüb ve Galata ve Üsküdar ve Boğaziçi’nde ricâl ve nisvân ve sagīr ve kebîr ve hizmetkâr ve civârı ve re‘âyâ her kim olur ise olsun mahallâtları hudûdunda fevt olanları Beytülmâl nizâmına tatbîkan isim ve şöhretiyle pusulasını getirip mûmâ-ileyh Defterdâr efendiye lede’t-takdîm uhdelerinde eshâm bulunanların lâzım gelen ihbâriyesi haber veren mahallât imâmlarına ve bî-kes yetîmi olup evvelce haber verir ise fakat yetîme verilip âhar kimesneler mahlûl haber verdiklerinde ihbâriye verilmemek üzere tanzîmi tensîb olunmuş ve keyfiyet tarafımızdan Bilâd-ı selâse kādıları efendilere başka başka fermân-ı âlî ısdârıyla tenbîh kılınmış olmağla imdi siz dahi keyfiyeti ber-vech-i meşrûh eimme-i mahallâta tenbîh ve fîmâ ba‘d ricâl ve nisvân sagīr ve kebîr ve hizmetkâr ve cevârî ve re‘âyâ her kim olur ise olsun mahallâtları hudûdunda fevt olanları Beytülmâl nizâmına tatbîkan isim ve şöhretleriyle pusulasının mûmâ-ileyh Defterdâr efendi tarafına haber vermelerini gûş-ı hûşlarına telkīne mübâderet eyleyesin deyü.
Fî 22 min-L sene 1242.
|