Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 396 Hüküm no: 461 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsak v. Abraham’ın kefaletten doğan borcunu müstemenler Danyal ve Kırinliya’ya ödemesi gerektiği Felemenk tüccârından olup mahrûse-i Galata’da müsâfiren sâkinler olan bâ‘isü hâze’l-vesîka Danyal v. Golok ve şerîki Kırinliya v. Perşin nâm müste’menler meclis-i şer‘-i şerîf-i lâzımü’t-teşrîfde tâife-i yahudun Budin cemâ‘atinden olup Hasköy sâkinlerinden İsak v. Abraham nâm yahudi mahzarında her biri üzerine da‘vâ ve takrîr-i kelâm edip merkūm İsak ile şerîki gāib ani’l-meclis Azaryan nâm yahudi’ye bundan akdem her zirâ‘ı ikişer esedî guruş ve birer sümüne olmak üzre yedi yüz yirmi iki buçuk zirâ‘ Londrine çukamızı bin beş yüz esedî guruş ve yirmi bir akçeye bey‘ ve teslîm mezbûrân İsak ve Azaryan dahi ale’ş-iştirâki’s-seviy vech-i meşrûh üzre iştirâ ve kabz ve tesellüm ve her biri âharın zimmetine lâzım gelen meblağa dahi emr ve kabûlü hâviye kefâlet-i sahîha-i şer‘iyye ile kefîl olduklarından sonra meblağ-ı mezbûrun beş guruş ve bir akçesini mezbûrân ahz u kabz edip bin beş yüz esedî guruş zimmetlerinde bâkī kalmağla meblağ-ı bâkī-i mezbûru yedimde olan hüccet-i şer‘iyye nâtıka olduğu üzre asâlet ve kefâletine binâen mezbûr İsak’dan mukaddemâ taleb ve da‘vâ eylediğimde ol dahi cevâbında zikr olunan çukayı vech-i meşrûh üzre gāib-i mezbûr ile iştirâk-i seviy üzre iştirâ ve kabz edip ve semenleri olan meblağ-ı mezbûrdan hissesine isâbet eden yedi yüz elli guruş zimmetinde bize deyni olduğunu ikrâr lâkin şerîki gāib-i mezbûrun hissesine isâbet eden yedi yüz elli guruşa ber vech-i muharrer kefâleti münkir olmağın ikrârı mertebesi olan yedi yüz elli guruşu bize edâya kıbel-i şer‘den merkūm İsak’a tenbîh olunup kefâlet-i mezbûreyi dahi bize beyâna havâle olunmuşidi hâlâ mezbûr İsak’a suâl olunup gāib-i mezbûr Azaryan’ın hissesine isâbet eden yedi yüz elli guruşu dahi kefâletine binâen bize edâya tenbîh olunmak matlûbumdur dediklerinde gıbbe’s-suâl merkūm İsak cevâbında fi’l-hakīka kaziyye bâlâda tafsîli mürûr ettiği üzre olduğunu ikrâr lâkin kefâlet-i mezkûreyi inkâr edicek müdde‘iyân-ı mezbûrândan kefâlet-i mezkûreyi mübeyyine beyyine taleb olundukda mahmiye-i İstanbul’da Balat hâricinde Sinyora cemâ‘atinden Abraham v. Aslan ve Mahmud Paşa sûkunda dellâl olan Ortaköylü cemâ‘atinden Salam v. Abraham nâm yahudiler li ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iyân-ı mezbûrân Danyal ve Kırinliya her zirâ‘ı ikişer guruş birer semene olmak üzre yedi yüz yirmi iki buçuk zirâ‘ Londrine çukaları işbu mezbûrân İsak ile şerîki merkūm Azaryan’a bin beş yüz esedî guruş ve yirmi bir akçeye bizim huzûrumuzda bey‘ ve teslîm mezbûrân İsak ve Azaryan dahi ale’l-iştirâki’s-seviy ber vech-i muharrer iştirâ ve tesellüm ve her biri âharın zimmetine lâzım gelen meblağa dahi kezâlik huzûrumuzda emr ve kabûlü hâviye kefâlet-i sahîha ile kefîl olmuşlar idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle yed-i mezkûrdan mezkûr Azaryan’ın hissesine isâbet eden meblağ-ı bâkī yedi yüz elli guruşu dahi kefâlet-i mahkiyesine binâen müdde‘iyân-ı mezbûrâna edâ ve teslîme merkūm İsak’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim b. Ahmed, Mustafa Çelebi Ser-muhzırân, diğer Mustafa Çelebi Kethüdâ-yı ser-muhzırân, İbrahim Çelebi b. Ahmed.