Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 397 Hüküm no: 462 Orijinal metin no: [74a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Ahmed Efendi Vakfı mütevelli kaymakamlığına tayin Mahmiye-i İstanbul’da Emin Sinan mahallesinde vâki‘ ashâb-ı hayrâtdan Mustafa Efendi b. Ahmed Efendi’nin vakfına mütevellî olan yine vâkıf-ı mezbûrun oğlunun oğlu Mustafa b. Yahya sagīr olup tevliyyet-i mezkûre merâsimi bi’z-zât edâya kādir olma[ma]kla, bir kāimmakām nasb ve ta‘yîn olunmak lâzım ve işbu bâ‘isü’l-kitâb yine mahalle-i mezbûr mescidi imâm nâib[i] olan Abdurrahman Efendi b. Ahmed hizmet-i mezbûre uhdesinden gelmeye kādir mütedeyyin ve perhizkâr olduğu zeyl-i kitâbda muharrerü’l-esâmî olan müslimîn ihbâr etmekle mâl-ı vakf-ı mezbûru i‘mâl ve hıfz vakf-ı mezbûrun kâtib ve nâzır ve câbîsi ve ahâlî-i mahalle-i mezbûrdan cemm-i gafîr ma‘rifetleriyle [74b] istirbâh ve hıfz ve’l-cümle merâsim-i tevliyyeti kemâ yenbağī istikāmet üzre edâ ve tevliyyet-i mezbûr fazlasından yevmî bir akçe ücrete mutasarrıf olmak üzre mezbûr Abdurrahman Efendi kāimmakām-ı mütevellî nasb ve ta‘yîn olundukdan sonra ol dahi kabûl ve hizmet-i lâzımesin kemâ yenbağī edâya ta‘ahhüd etmeğin işbu hurûf ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Fahrü erbâbü’t-tahrîr dükkânî Mustafa Efendi, nâzır Mehmed Efendi el-İmâm, kâtib-i vakf imâm İbrahim Efendi, el-Hâc Mehmed Ağa, el-Hâc Osman.