İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 303 Hüküm no: 146 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1243 senesi İstanbul avarız bedellerinin tahsili emri Avârız fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki Hazîne-i âmire’m defterleri mûcebince İstanbul kazâsının iki bin altı yüz doksan beş buçuk ve bir sülüs avârız hânesi olup bin iki yüz kırk üç senesine mahsûben cem‘ ve tahsîli lâzım gelmeğin ( ) deruhde olunup yedine mühürlü ve nişanlı Mevkūfât defteri sûreti mûcebince cem‘ ve tahsîl ettirilmek fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi sene-i merkūma mahsûben kazâ-i mezbûrun ol mikdâr avârız hânesi olup Tersâne-i âmirem ocaklığı olmağla beher hânesinden dörder yüz yirmi dokuz akçe kürekçi bedellerin irsâl olunan mühürlü nişanlı Mevkūfât defteri sûreti mûcebince vakt ü zamânıyla yerli yerinden cem‘ ve tahsîl ve dâhil-i Tersâne-i âmirem ettirdip hilâf-ı emr-i defter kimesneye ta‘allül ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşi’çün her bir avârız hânesinden otuzar akçe ve on beşer akçe harc-ı Tersâne-i âmirem için aldırdıp ve avârız için alınan akçenin her yüz on akçesinden bir esedî guruş tahsîl olunup ve hîn-i tahsîlde mîrî’çün alınan akçeyi Hazîne-i âmireme alındığı vech üzere aldırdıp bundan ziyâde ve noksan alınmaya ve aldırmayasın kesr-i defterden ve nakz-ı hâneden ve fermân-ı âlîşânımdan ziyâde mutâlebesiyle re‘âyâ fukarâsına zulüm ve te‘addî gāyetü’l-gāye hazer ve mücânebet eyleyesin. Şöyle bilesin alâmet-i şerîfime i‘timâd kılasın. Tahrîren fi’l-yevmi’l-hâmis şehri Muharrem’il-harâm sene selâse ve erba‘în ve mi’eteyn ve elf. Kostantıniyyeti’l-mahrûse