İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 304 Hüküm no: 147 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köstendilli Tahir Efendizâde Abdullah Âtıf Efendi’nin kumaş dokumasına izin verildiği Bâ-sahh-ı âlî. İstanbul kādısı fazîletlü efendi ve İhtisâb ağası Köstendilli Tahir Efendizâde’nin akmişe nesc ve i‘mâline ruhsat bâbında emr-i âlî. Köstendilli müteveffâ Tahir Efendizâde müderrisînden Abdullah Âtıf Efendi bu def‘a kendi hânesinde destgâh inşâsıyla numûne olmak üzere şâlî ve çiçekli ve akmişe-i sâire nesc ve i‘mâl ve numûne-i mezkûreleri Bâb-ı âlî’ye takdîm ve ruhsat-ı seniyye erzânî buyrulduğu sûretde Beykoz kâğıdhânesinde destgâhlar inşâsıyla eşyâ-i mezkûreyi i‘mâl edeceğini bâ-takrîr inhâ ve ifâde etmiş ve bu husûs mücerred Devlet-i aliyyeye ibrâz-ı hizmet ve menfa‘at zımnında idiğine binâen hâk-i pây-i hümâyûn-ı mülûkâneden lede’l-istîzân inhâsı vechile ruhsat i‘tâ olunması husûsuna irâde-i seniyye-i şâhâne ta‘alluk eylemiş olup Dersa‘âdet ve havâlîsinde kâin eşyâ-yı mensûce esnâfının şâyed sûret-i irâde ma‘lûmları olmayarak efendi-i mûmâ-ileyhin i‘mâl edeceği eşyâya bir gûne ta‘arruz ve müdâhaleye tasaddî ve eşyâ ve amele misilli mâllarca tedârikine müdâhale ve te‘addîleri vukū‘a gelir ise o makūlelerin men‘i lâzımeden olmağla efendi-i mûmâ-ileyhin ücret-i lâzımeleri kendi tarafından verilmek ve bi’t-tav‘ ve’r-rızâ celb ve istihdâm etmek üzere tedârik edeceği amelenin ma‘iyyetinde istihdâmı husûsunda bir tarafdan müdâhale vukū‘a getirilmemesi husûsunun Kemhacı ve Sandalcılar kethüdâlarına Serâsercibaşı’ya ekîden tenbîh ve mübâderet eyleyesiz deyü. Fî 12 min-M sene 1243.