İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 305 Hüküm no: 148 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bir daha açılmamak üzere kapatılan kahvehanelerin başka dükkânlara çevirilmesi, çevrilmeyenlerin ise yıkılması emri Bâ-sahh-ı âlî. İstanbul kādısı fazîletlü efendi. Mesdûd kahvehâneler âhar dükkâna tebdîli bâbında emr-i âlî. Bir müddetden beri ba‘zı cehele-i nâsın kâr ü nef‘ garaz-ı fâsidesiyle Âsitâne ve civârında îcâd ve inşâ ettirmiş oldukları kahvehâneler mecma‘-ı erâzil ve eşhâs ve menba‘-ı çirkâb-ı erâcîf-i evbâş olmuş ve salâh-ı hâl-i âlem için def‘ ve tathîri husûsuna ikdâm-ı tâm olunması rütbe-i farziyyete varmış iken ekser-i ashâbı ocağ-ı mülgā mensûbâtından olduğundan icrâsı terk ve tehîr olunduğu hâlde avn ü nusret-i hazret-i hayrü’n-nâsırîn ile ocağ-ı mezkûrun def‘ ve ilgāsı sırasında mücerred istihsâl-i intizâm-ı mülk ve millet irâde-i hayriyyesiyle o makūle kahvehânelerin ocakları hedm ve imhâ ile seddettirilmiş ve fîmâ ba‘d bunların küşâdı ihtimâli olmadığından o misilli kahvehâneleri ashâb-ı sâire tebdîl eylemeleri lâzım gelenlere beyân ve îmâ kılınmış ise de ba‘zı sebük-mağzân kahvehâneleri yine açılır ümîdine düşerek şimdiye kadar hey’etiyle ibkā etmiş oldukları meşhûdumuz olup hâlbuki bunları böyle seddi mücerred salâh-ı hâl-i âlem için ittifâk-ı ârâ ve irâde-i kātı‘a-i cenâb-ı pâdişâh-ı kişver-güşâ ile icrâ olunmuş olduğundan bu maddede ısrâr ve inâd izhâr edenlerin levâzım-ı tedîb ve terbiyelerinin icrâsı ehem ve bundan böyle yirmi nihâyet otuz güne kadar o makūle menba‘-ı erâcîf ve ekâzîb olan kahvehâne ashâbı mesdûd olan dükkânlarını başka sûrete tebdîl etmeyerek yine hey’etiyle ibkā eylediği manzûrumuz olur ise ashâbı eşedd-i itâb ve ikāba müstahik olacağından başka dükkânı temelinde hedm ve ifnâ kılınacağı musammem olmağla siz evvel emirde lâzım gelenleri celb ile bundan sonra ya‘ni yirmi nihâyet otuz gün kadar ol makūle kahvehânesi olanlar dükkânlarını mahzûr ve mazarratı olmayan başka sûrete tahvîl eylemezler ise [54a] haklarında tedîbât-ı lâzıme icrâ olunacağından gayrı dükkânları hedm ve imhâ olunacağını kat‘îce gûş-ı hûşlarına ilkā ve tefhîme mübâderet eyleyesin deyü. Fî 10 M sene [1]243.