İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 306 Hüküm no: 149 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayakkabı narhı Bâ-sahh-ı âlî. İstanbul kādısı fazîletlü efendi. Ayakkabı narhına dâir. Dârü’l-hilâfeti’l-aliyye’de mütemekkin ibâdullâhın havâyic-i zarûriyelerinin fiyat-ı mukadderesinden ziyâdeye alınıp verilmemesine ve râdde-i lâyıkasında istikrârı esbâbının istikmâline müstemirren i‘tinâ ve dikkat olunmak lâzıme-i zimmet-i me’mûriyet olduğu derkâr ise de bir müddetden beri ibâdullâhın havâyic-i zarûriyelerinden ma‘dûd olan envâ‘-ı ayakkabıları husûsuna bakılamadığından haffâf esnâfı istedikleri gibi gabn-i fâhiş ile fürûht ederek ibâdullâhı ızrâr etmekde oldukları mesmû‘ ve meşhûd olarak bu husûsun dahi bir taht-ı râbıtaya bend ve tevsîkiyle ibâdullâhın bu bâbda dahi zarâr ve ziyândan vikāyesi lâzım gelmiş olmağla o makūle ayakkabılarının asl-ı mâlı zahîre ihrâc ve gereği gibi hesâb ve dikkat olunarak gerek dikici ve gerek haffâfın kâr-ı şer‘îleri cânib-i şer‘-i şerîfden ta‘yîn olunup vaz‘ olunacak fiyatdan bir akçe ziyâdeye satanlar ve alanlar olur ise bilinmez sûretler ile tebdîller ta‘yîn ve taharrî olunacağından derhâl o misilli bâyi‘ ve müşteri ahz olunarak haklarında tedîbât-ı şedîde mu‘âmelesi icrâ kılınacağını iktizâ edenlerin celb ile gûş-ı hûşlarına ilkā ve tefhîm ve narh ve fiyatını takvîm ile pusulasının Bâb-ı âlî’ye takdîmi husûsuna mübâderet eyleyesiz deyü. Fî 27 min-M sene 1243.