İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 306 Hüküm no: 150 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber dükkânlarının kapatılmış olan kahvehanelere taşınmaması emri Mesdûd olan kahvehânelere naklolunacak berber gedikleri tanzîmi. Avn-i inâyet-i Bârî’yle Yeniçeri maddesi ber-taraf kılınarak me’vâ-yı gürûh-ı fesede olan kahvehânelerin sedd ü bendi irâde-i hayriyyesine mebnî muhterik olmuş veyâhud binâya katılmış Başmuhâsebe’de mukayyed berber dükkânı gediklerinin âhar gedikden ârî dükkânlara bi’l-icâreteyn mutasarrıfları rızâsıyla nakline ruhsat verilmiş olmak hasebiyle ba‘zı kesân aralık aralık yedlerinde olan berber gediklerini kebîr ve bahçeli ve odalı kahvehânelere nakl dâ‘iyesine düşmüş oldukları ihbâr olunup hâlbuki berber gediği naklolunacak hânenin tûlen sekiz ve nihâyet on zirâ‘ ve arzen altı ve nihâyet yedi zirâ‘ kadar olması ve kat‘â oda ve bahçeyi müştemil olmaması lâzımeden olmağla zinhâr ve zinhâr o makūlelerin istid‘âsına müsâ‘ade olunmamak ve el-hâletü hâzihî mevcûd olan berber dükkânlarında her ne kadar vüs‘atli ve bahçeli dükkân var ise de kadîmden mebnî olmak hasebiyle nizâma tevfīkan tanzîmi ashâbına gadri mûcib olacağından bundan böyle bi’l-îcâb hîn-i ta‘mîrinde ve inşâsında nizâm-ı mezkûra tevfīkan yapdırılmak ve bu husûsa ale’d-devâm me’mûrlar havâle-i çeşm-i dikkat ederek sâlifü’z-zikr nizâmdan ziyâde vakten mine’l-evkāt hilâfına ruhsat ve cevâz gösterilmemek üzere keyfiyeti Başmuhâsebe’ye kayd ile İstanbul Mahkemesi ve İhtisâb ağası ve Mi‘mâr ağa vesâir lâzım gelen mahallere ilmühaberinin i‘tâsına mübâderet olunmak bâbında beyaz üzerine sâdır olan fermân-ı âlî mûcebince Başmuhâsebe’ye kayd ile ilmühaberleri verilmek fermân buyrulmağın mûcebince Başmuhâsebe’ye kaydolunup İhtisâb ağası ve Mi‘mâr ağa taraflarına ilmühabereleri verilmekle İstanbul Mahkemesi tarafına dahi işbu ilmühaber verildi. Fî selhi Muharrem sene 1243.