İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 309 Hüküm no: 152 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fes fiyatlarının bir nizama konulması için Kâtibzâde Mustafa Efendi’nin görevlendirildiği Bâ-sahh-ı âlî. İstanbul kādısı fazîletlü efendi. Fesci esnâfına dâir emr-i âlîdir. Ötedenberü fesci esnâfı muhtekir ve hîlekâr bir tâife olarak aldıkları fes vesâir eşyânın üzerine evvel emirde kethüdâ ve ihtiyârları Lonca odalarında vâfir şey zam ile beynlerinde taksîm ve ba‘dehû âhâd-ı esnâfa tevzî‘ ede geldiklerinden onlar dahi fâhiş kâr zammından başka evsatı a‘lâ ve ednâyı evsat bahâsına satarak ibâdullâhı ızrâr ve tüccârın akçelerini dürlü dürlü sûretler ile itlâfa ibtidâr eylemekde oldukları sahîhen tahkīk olunmuş ve bu cihetle sâye-i hümâ-vâye-i şâhânede bu maddeye bir hüsn-i sûret verilerek ibâdullâhın gadr ve hasârdan himâyeleri lâzım gelmiş olduğundan işbu husûsa dahi Asâkir-i Mansûre-i Muhammediye fesleri tanzîmine ta‘yîn olunan Kâtibzâde Mustafa Efendi memûr kılınmış olmağla efendi-i mûmâ-ileyh hâzır olduğu hâlde bu maddenin nizâmını mübeyyin yedinde olan lâyiha ve esnâf-ı merkūmenin yedlerinde bulunan evâmir sûretleri mütâla‘a ve nizâm-ı keyfiyeti müzâkere olunarak esnâf-ı merkūmenin <> celbiyle evvel emirde nizâm-ı keyfiyetini gûş-ı intibâhlarına ilkā ve fîmâ ba‘d hilâf-ı nizâm hareket etmemelerini ve mugāyir-i rızâ hareket ederi bulunur ise tedîbât-ı lâyıkası icrâsında dakīka fevt olunmayacağını tehbîh ve inbâ ederek bu bâbda olan ta‘ahhüdlerini tescîl ve i‘lâma ihtimâm ve i‘tinâ eyleyesin deyü. Fî 9 Ra sene 1243.