İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 310 Hüküm no: 153 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i Mansûre-i Muhammediye’nin ayakkabıları ve sarrac takımları için gerekli tirşe ve meşin vermeye devam etmeleri için debbağ tâifesine Hacı Ragıb Efendi’nin nâzır tayin edildiği Bâ-sahh. İstanbul kādısı fazîletlü efendi. Debbâğ esnâfına müte‘allık tirşe ve meşine dâir emr-i âlî. Ma‘lûmunuz olduğu üzere debbâğhâneler nizâmına bâ-irâde-i seniyye Hâcegân-ı dîvân-ı hümâyûn’dan Hacı Ragıb Efendi memûr ve ta‘yîn kılınmış olmak hasebiyle mûmâ-ileyhin me’mûriyeti Asâkir-i Mansûre-i Muhammediye’nin ayakkabıları ve sarrac takımına müte‘allık eşyânın hüsn-i sûretle i‘mâli irâdesinden ibâret ve bu husûsun rü’yeti dahi debbâğ ve dikici ve sarrac ve haffâf ve tâcir esnâfının istihdâmlarına mevkūf idiği rehin-i hayyiz-i berâhin olarak bu sûretle esnâf-ı merkūmenin cümlesini efendi-i mûmâ-ileyhi üzerlerine nâzır bilip her bir re’y ve talebine muvâfakat ile madde-i ihtikârdan mübâ‘adet eylemeleri lâzım gelmiş ve debbâğ esnâfı ötedenberü ve cânib-i mîrîye veregeldikleri tirşe ve meşin mühimmâtını kemâ-kân tamamen edâ ile ibrâz-ı hüsn-i hizmete ta‘ahhüdü mutazammın memhûr ve mümzâ bir kıt‘a sened i‘tâ eylemiş olmağla siz dahi esnâf-ı merkūmeyi nezdinize celb ederek cümlesi efendi-i mûmâ-ileyhi üzerlerine zâbit ve nâzır bilip iktizâsına göre re’y ve talebine muvâfakat ve madde-i ihtikârdan mücânebet eylemelerini ve debbâğ esnâfının ta‘ahhüdleri vechile ötedenberü cânib-i mîrîye veregeldikleri tirşe ve meşin tamamıyla edâ ve gâvsâle i‘ânelerini dahi nâzır-ı mûmâ-ileyhin ma‘rifetiyle tanzîm ederek bilâ-tehîr mahallerine îfâ eylemelerini gûş-ı hûşlarına ilkā ve tefhîme mübâderet eyleyesin deyü. Fî 7 R sene [1]243