Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 398 Hüküm no: 463 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Ahmed Efendi Vakfı’na mütevelli tayini Min mümzâtihî Mahmiye-i İstanbul’da Emin Sinan mahallesinde sâkin iken bundan akdem vefât eden ashâb-ı hayrâtdan yine mahalle-i mezbûre mescid-i şerîfi müe[zzini] el-Hâc Mustafa Efendi b. İsmail ve sulbî oğlu ve vakfiye-i ma‘mûlün-aleyhâ üzre nemâsını eczâ-i şerîf ve sâir vücûh-ı birre şart ve ta‘yîn eylediği nukūd-ı mevkūfesine meşrûtiyyet üzre mütevellî olan Yahya Çelebi fevt olup yerine bir mütevellî nasb ve ta‘yîn olunması lâzım ve mühim ve mezbûr Yahya’nın sulbî sagīr oğlu Mustafa her vechile tevliyyet-i mezkûreye müstahık olduğunu zeyl-i kitâb-ı müşgîn-nikābda mektûbü’l-esâmî olan müslimîn ihbâr etmeğin işbu kitâb-ı sıhhat-nisâbın tevkī-i refî‘-i müstetâbıyla şeref-yâb olan hâkim-i ma‘delet-bâb hazretleri umûr-ı tevliyyeti kāimma[k]ām ve nâib-i menâbı kemâ yenbağī görüp hizmet-i lâzımesini ber vech-i meşrûh edâ olunmak üzre tevliyyet-i mezkûru mezkûr Mustafa’ya tevcîh buyurulup işbu vesîka-i enîka ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Fahrü erbâbü’l-kalem dükkânî Mustafa Efendi, nâzır Fahreddin Efendi, kâtib-i vakf imâm İbrahim Efendi, el-Hâc Mehmed Ağa.