İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 311 Hüküm no: 154 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ tâifesinin miriye meşin ve tirşe vermeye devam edeceklerine dair taahhütleri Debbâğ esnâfının arzuhâlleri. Ehl-i ırz zümresinden ve Devlet-i aliyye bendesinden olan debbâğ esnâfı kullarıdır ki; Bu kullarını himâyet ve sıyânet zımnında hamden sümme hamden taraf-ı Devlet-i aliyyeden nâzır ta‘yîn olunmasında esnâf-ı merkūm kullarını müceddeden ihyâ buyrulmuş olup ve mine’l-kadîm cânib-i mîrîye verile gelen tirşe ve meşin bu âna kadar edâda tekâsül olunmayıp ve bundan böyle dahi efendi-i mûmâ-ileyh kulları ma‘rifeti ile edâda kusûr olunmayarak dîn ü Devlet-i aliyye ve Asâkir-i Mansûre-i Muhammediye hizmetlerinde sadâkat ve istikāmet üzere hizmet olunacağını mübeyyin işbu mümzâ ve memhûr arzuhâlimiz hâk-i pây-i hâcet-revânelerine takdîm kılındı bâkī emr ü fermân devletlü inâyetlü merhametlü efendim sultanım hazretlerinindir. Bende İhtiyâr-ı Tophâne İsmail Bende İhtiyâr-ı Üsküdar Hacı Mahmud Bende İhtiyâr-ı Kasımpaşa Hacı Ömer Bende İhtiyâr-ı Eyüb-i Ensârî İbrahim Bende İhtiyâr-ı Yedikule Seyyid Halim Bende Tophâne kethüdâsı Mehmed Bende Üsküdar kethüdâsı Mustafa Bende Kasımpaşa kethüdâsı el-Hâc Salih Bende Eyüb-i Ensârî kethüdâsı Seyyid Veliyüddin Bende Yedikule kethüdâsı Şeyh Mustafa