İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 312 Hüküm no: 156 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hiç kimsenin üzerinde silâh taşımaması emri Bâ-sahh-ı âlî. İstanbul kādısı fazîletlü efendi. Tabanca vesâir esliha takınmak bâbında. Âsitâne-i şevket-âşiyâne dârü’l-emân olarak herkesin gezip sâye-i mer[â]him-vâye-i şâhânede âsûde-nişîn-i istirâhat olması maksûd-ı âlî ve mukaddemlerde ocağ-ı mülgā mensûbâtından olan bir takım havene hilâf-ı rızâ-i sâmî esliha istishâblarını i‘tiyâd etmişler ise de lillâhi’l-hamd ve’l-minne tâife-i merkūme ocaklarıyla berâber berbâd olduğu bedîhî olmak ve o misilli havene-i ma‘dûdunun [ma‘hûdenin] vücûd-ı habâset-ilvameleriyle [habâset-alûdlarıyla] ma‘an imhâ olunan hâlât-ı kabîhanın zinhâr ve zinhâr meydâna çıkmamasına i‘tinâ olunması mertebe-i vücûba varmak hasebiyle hiç ferdin ve ale’l-husûs sunûf-ı asâkir-i mezîdenin Dârü’l-hilâfeti’l-aliyye ve civârında esliha ile gezmemesi ve asâkir-i şâhânenin birisinde kendilere mahsûs olan eşyâdan başka eslihaya dâir bir şey bulunmaması irâde-i seniyye-i mülûkâne iktizâsından iken bu esnâda humbaracı ve lağımcı neferâtından ba‘zılarının bellerinde tabanca ve tokmak ve topcu vesâirlerinde kama misilli esliha görülmekde olduğuna binâen bu keyfiyet nizâmât-ı askeriyenin hilâfı ve emr ü rızâ-i meyâmin-irtizâ-yı şâhâneye münâfî olarak fîmâ ba‘d gerek asâkir-i mürettebeden ve gerek sâirden her kim ol makūle men‘-i küllî ile memnû‘ olan esliha istishâbına cesâret eder ise bilâ-emân hakkında mücâzât-ı şedîde icrâsında dakīka tehîr olunmayacağı bu def‘a beyaz üzerine buyruldular ısdârıyla iktizâ edenlere tenbîh olunmuş olmağla siz dahi bu husûsa ale’d-devâm bizzât nezâret-birle bundan böyle hiç kimesnenin tabanca ve tokmak ve kama vesâir eslihaya dâir şey istishâb eylememesi esbâbını istihsâle dikkat ve bu usûlün ilâ-mâşâallâhi te‘âlâ icrâ olunacağını iktizâ edenlerin gûş-ı hûşuna ilkā ve tefhîme mübâderet eyleyesiz deyü. Fî 4 R sene 1243.