İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 317 Hüküm no: 158 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cami ve mescidlerde kılınan namazlardan sonra cemaatin dua ve istiğfara kalmaları Bâ-sahh-ı âlî. İstanbul kādısı fazîletlü efendi. Evkāt-ı hamsede ba‘de’s-salât du‘â ve istiğfâr için. Cümleye beyân ve tavsîfden müstağnî olduğu üzere ba‘de edâyi’s-salât istiğfâr ve du‘â emr-i hasenden ve herkesin cemâ‘ate devâmla beş vakitde mansûriyet-i İslâm ve makhûriyet-i a‘dâ-yı li’ân du‘âsına muvâzabet ve indellâh ve inde’r-resûl emr-i mergūb olan istiğfâra müdâvemet eylemeleri derece-i vücûba makrûn iken bir müddetden beri cevâmi‘ ve mesâcidde salât-ı mefrûza îfâ olundukdan sonra cemâ‘at-i Müslimînden ba‘zı kimesneler istiğfâr ve du‘âya kalmayarak gittikleri meşhûd ve cemî‘ zamânda ehl-i İslâmın vesîle-i fevz ve necât olan du‘â ve istiğfâra müdâvemet eylemeleri matlûb ve maksûd olmağla siz bi’l-cümle eimme-i mahallâtı nezdinize celb ile fîmâ ba‘d mahalleleri ahâlîsinin evkāt-ı hamsede salât-ı mefrûzayı ba‘de’l-edâ savuşmayıp istiğfâr ve du‘âya kalmalarını ve cemâ‘ate devâm etmez ve istiğfâr ve du‘âya kalmaz olanların bi’t-tahkīk tedîbât-ı şedîdeye mazhar olacaklarını gûş-ı hûşlarına telkīn ve ilkā etmek üzere tenbîh ve tefhîme mübâderet eyleyesiz deyü. Fî 21 R sene 1243.