İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 318 Hüküm no: 159 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erkeklerin süslü ve işlemeli elbiseler giymemeleri emri Bâ-sahh-ı âlî. İstanbul kādısı fazîletlü efendi. Tâife-i zükûr sırmalı ve telli nesne giymemeleri bâbında emr-i âlîdir. Bir müddetden beri âsâyiş-i ibâdın esâs-ı kavîsi olan nizâmât-ı mülkiyye-i saltanat-ı seniyyeye lâyıkıyla bakılamadığından her bir şey tavr-ı kadîminden çıkıp ez-cümle ekser-i nâs sırma ve tel ve kılabdanlı yelek ve fermene vesâir envâ‘-ı esvâb iktisâsıyla ser-fesâd-ı sefâhati i‘tiyâdlanmış oldukları zâhir ve lillâhi’l-hamd ve’l-minne sâye-i adâlet-vâye-i hazret-i pâdişâhîde her bir şey gün be-gün yoluna girmekde olduğundan âmme-i nâsın dahi dünyevî ve uhrevî mazarratdan başka bir fâideyi müntic olmayan bî-hûde itlâf ve isrâfdan tahlîsleri şer‘an ve mülken lâzım geleceği bedîhî ve bâhir olduğuna binâen bu emr-i menhînin külliyen men‘ ve def‘i husûsuna irâde-i seniyye ta‘allukuyla muktezâsının icrâsı sa‘âdetlü serasker paşa hazretlerine ve Bilâd-ı selâse kādılarına vesâir lâzım gelenlere başka başka buyruldular ısdârıyla tavsiye ve iş‘âr olunmuş olmağın imdi siz dahi İstanbul’da kâin derzi esnâfı nisvândan mâ‘adâ yalnız sagīr ve kebîr zükûra mahsûs olan esvâba sırma ve tel ve kılabdan hıyâtet etmemelerini ve ederler ise tedîb-i şedîd ile tedîb kılınacaklarını esnâf-ı merkūmenin kethüdâlarına ve nisvândan mâ‘adâ küçük ve büyük hiç ferd ve [56b] zer ü simden masnû‘ ve ma‘mûl entâri ve telli şeridli biniş ve cübbe ve kılabdanlı fermene ve sıkma ve sâir bunlar misilli esvâb giymemelerini dahi mahallât imâmlarına tenbîh ve tekîde dikkat ve dâimen ve müstemirren bu maddeye gereği gibi takayyüd ile hilâfı vukū‘a gelmemesine mübâderet eyleyesin deyü buyruldu. Fî 22 min Ra sene 1243.