İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 318 Hüküm no: 160 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâb-ı âlî civarında bulunan berber dükkânlarının Ayasofya civarında kapatılan kahvehane dükkânlarına taşınması Bâb-ı âlî’ye ilâve olunan on iki bâb berber dükkânları mahâll-i âhara nakline ruhsat ilmühaberi. Berây-ı i‘tâ-i âlât-ı lâzıme-i nakl-i gedikhâ-i dekâkîn-i berberân der-kurb-ı Bâb-ı âlî ki mahâll-i dekâkîn-i mezkûr an-ebniye-i Bâb-ı âlî ilâve der-hîn-i tedârik-i münâsib dükkân-ı gedikhâ-i merkūmîn nakl şüde an-cânibi Mahkeme-i İstanbul i‘lâmât i‘tâsına ilmühaber dâde bizzât arzuhâl ve derkenâr ve takrîr ve memhûr-ı i‘lâm-ı Abdurrahman Efendi Kādı-yı İstanbul ve fermân-ı âlî. Fî 17 M sene 1243 Paşakapısı’nda es-Seyyid Mehmed Usta dükkânı: 1 aded Sırasında Hacı İbrahim Usta dükkânı: 1 aded Altyanında Halil Usta dükkânı: 1 aded Yine mahâll-i merkūmede Hüseyin dükkânı: 1 aded İttisâlinde Hacı Osman Usta dükkânı: 1 aded Paşakapısı sırasında Osman Usta dükkânı: 1 aded Altyanında es-Seyyid Osman Usta dükkânı: 1 aded Altyanında Süleyman Usta dükkânı: 1 aded Sırasında Ali Usta dükkânı: 1 aded Köşebaşında Râşid Usta dükkânı: 1 aded Kebabcıya muttasıl Ahmed Usta dükkânı: 1 aded Şâkir Usta dükkânı altyanında Ali Usta dükkânı: 1 aded Bâb-ı âlî’ye ilâve olunmak üzere bu def‘a bâ-irâde-i aliyye tefevvüz olunan on iki bâb berber dükkânları gediklerinin Ayasofya-i kebîr civârında vâki‘ mesdûd kahve dükkânlarına nakline ruhsat buyrulmasını dekâkîn-i mezkûr gedik ashâbı Bâb-ı âlî’ye arzuhâl takdîmiyle istid‘â eylediklerinden kuyûda mürâca‘at olundukda Bâb-ı âlî civârında kâin on iki bâb berber dükkânı gedikleri mukayyed olduğu ve bu makūle gedik naklinde muahharan naklolunacak gedik sâhibinin rızâsı munzam olmak nizâmından idiği Başmuhâsebe’den derkenâr olundukdan sonra Hâssa mi‘mârbaşısı izzetlü ağa tarafından lede’l-isti‘lâm zikrolunan dükkânlar mutasarrıflarından tefevvüz ve mu‘acceleleri tamamen i‘tâsıyla Bâb-ı âlî’ye ilâve olunmuş ve gedikleri ashâbına terk kılınmış ve gediklerinin mahâll-i âhara nakli kā‘ide buyrulmuş olduğundan ber-mûceb-i istid‘â mahâll-i mezkûra yâhud mahâll-i sâireye nizâmları mûcebince nakl ve küşâdı husûsunu İstanbul kādısı fazîletlü efendi hazretlerine havâle ile tanzîmi husûsu menût-ı re’y-i âlî idiğini i‘lâm etmeğin zikrolunan gediklerin nizâmına tatbîkan münâsib mahallere mülk sâhiblerinin re’y ve rızâları munzam olunarak nakilleri husûslarının iktizâ-yı nizâmı i‘lâm olunması bâ-takrîr lede’l-arz ber-mûceb-i takrîr iktizâsı kādı-i müşârun-ileyh hazretlerinden lede’l-isti‘lâm mûcebince Berber esnâfının Kethüdâsı İbrahim ve Şeyhî Abdi Efendi ve Du‘âcısı İsmail Efendi ve Yiğitbaşısı Nuri Ağa ve Çavuş Molla Mustafa ve köşe ustaları vesâir müsinn-i ihtiyârları İstanbul kādısı huzûruna celb ile suâl olundukda kā‘ide-i âlî üzere her birleri bir mahalle kahvehâne şeklinde olmayarak birer münâsib dükkân tedârik etmekde olduklarını ber-vech-i istid‘â nakli husûsu nizâmlarına muvâfık olduğu ihbâr olunmağla keyfiyeti Başmuhâsebe’ye kayd ile her biri dükkânlarını tedârik ve nakli istid‘â ettikce şürût ve nizâmlarına tatbîkan i‘lâm olunup mûcebince kaleminden ashâbı yedlerine sûret i‘tâsı’çün ifâde-i hâl siyâkında İstanbul Mahkemesi’ne ilmühaberi i‘tâsını i‘lâm etmekle i‘lâmı mûcebince tanzîm olunmak bâbında sâdır olan fermân-ı âlî mûcebince kayd ile İstanbul Mahkemesi’ne ilmühaberi <> verilmek fermân buyrulmağın mûcebince kaydolunup İstanbul Mahkemesi’ne işbu ilmühaber verildi. Fî 18 min-M sene 1243