İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 320 Hüküm no: 161 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul içinde bulunan fırın ve değirmenlerin bir sebeple şehir dışına taşınmalarına izin verilmemesi Bâ-sahh-ı sâmî. İstanbul kādısı fazîletlü efendi. Uncu ve ekmekci fırınlarının taş nizâmına dâir. Bir müddetden beri Âsitâne-i sa‘âdet’de vâki‘ uncu değirmenleri ve ekmekçi fırınları ve fırınlara merbût olan ekmekçi değirmenleri ba‘zan bi-kazâillâhî te‘âlâ muhterik ve ba‘zıları harâb oldu denilerek ta‘tîl olunduğu ve uncu değirmenleri horoslarını battâl nâmıyla kadîmden Bilâd-ı selâse’ye Âsitâne derûnundan horos ve ekmekçi değirmenine ve uncu taşı nakli memnû‘iyeti derkâr iken bir takrîb naklolunarak Âsitâne’de uncu taşına noksan târî olduğu meşhûd ve bu maddenin hüsn-i sûrete rabtı lâzım geldiği zâhir ve rû-nümûd olmağla fîmâ ba‘d bilâd-ı merkūmeye Âsitâne’den nakli memnû‘ olan uncu taşı naklolunmamak esbâbını istihsâl ederek muhterik olan kaç fırındır ve merbût olup muhterik olan değirmen taşları ne mikdârdır ve mevcûd olduğu hâlde a‘zâr-ı vâhiye ile ta‘tîl olunan ne mikdâr fırın ve değirmen ve değirmeni mevcûd yanmış fırın ne kadara bâliğ olur Kapan nâibi efendi ve ekmekçi ve uncular kethüdâları ile bi’l-cümle nizâm ustaları ma‘rifetleriyle taharrî <> ve tahkīke dikkat ve hakīkatı üzere bir kıt‘a defterinin tanzîmiyle takdîmine mübâderet eylemelerini nâib-i mûmâ-ileyhe esnâf-ı merkūmeye tenbîhe mübâderet eyleyesin deyü buyruldu. Fî 3 min Ca sene 1243.