İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 326 Hüküm no: 164 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırınların ürettikleri ekmeklerin ağırlığına, has ve pişkin olmasına özen göstermeleri Bâ-sahh-ı âlî. İstanbul kādısı fazîletlü efendi ve İhtisâb ağası. Nân-ı azîze dâir. Dârü’l-hilâfeti’l-aliyye’de kâin habbâzân fırınlarında nân-ı azîzin kadr-i kifâyede olarak vakt ü zamânıyla tabh ve i‘mâl olunup sâye-i hümâ-vâye-i hazret-i pâdişâhîde ibâdullâh nân-ı azîz husûsunda zarûrete dûçâr olmamak üzere habbâzân esnâfının zahîre ve levâzım-ı sâireleri ikmâl kılınmakda olduğundan esnâf-ı merkūmenin vukū‘â gelen istirhâm ve istid‘âlarına mebnî dirhem husûsuna dahi dilhâhları vechile müsâ‘ade olunmuş ve artık bu bâbda bir diyecekleri kalmamış olduğundan haklarında erzân buyrulan işbu inâyetin şükrünü bilerek tabl eyledikleri nân-ı azîzin sikkesini uydurup hâs ve pişkin nân-ı azîz tabh ve i‘mâline nizâm ustaları ta‘ahhüd eylemiş ve bu husûs defa‘âtle tenbîh olunmuş iken bir semeresi müşâhede olunamamış ve nân-ı azîzin sikkesi kat‘â fark etmemiş olduğundan bu def‘a başkalarına dahi mûceb-i tenbîh ve gûşmâl olmak üzere nizâm ustalarından David ve Beşiktaşlı Aleksan zimmîler ile Sırmakeşhâne fırını ustası Haçok zimmî ve Mercan fırını ustası ve Sultanmehmed’de Karaman fırını ustası ve Çarşambapazarı’nda Mehmed Ağa câmi‘ fırını ustası li-ecli’t-tedîb vaz‘-ı kürek olunmuş olmağla siz dahi ba‘d ez-în nân-ı azîzin ta‘ahhüd olunduğu üzere has ve pişkin olarak tabh ve i‘mâl ettirilmesine ve fırınlarda vakitsiz nân-ı azîz tabh olunmak vesîlesiyle galabaların peydâ olmaması esbâbanın istihsâline nasb-ı nefs-i ihtimâm ve gayret eyleyesiz deyü. Fî 10 Ca sene 1243.