İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 326 Hüküm no: 165 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüz yirmi dirhemlik ekmeğin dört paraya satılması ve fırınlarla ilgili yapılan düzenlemeler Bâ-sahh-ı âlî. İstanbul kādısı fazîletlü efendi. Yüz yirmi dirhem nân-ı azîz dört paraya idiğini müş‘ir. Halic-i Dârü’l-hilâfeti’l-aliyye’de bulunan İngiltere ve Rusya sefâyininde mevcûd Rusya hıntası cânib-i Devlet-i aliyyeden mübâya‘a olunmakda olunduğundan ve hınta-i mezkûrenin bu vechile mübâya‘a ve iştirâsı îcâb-ı vakt ü hâlden neş’et eylediğinden olduğu hey’etle nân-ı azîz tabh ettirilip her ne mikdâra olur ise ol bahâ ile ibâdullâha fürûht ettirilmesi husûsu mukaddemce meclis-i şûrâda karâr-gîr olmuş ve ba‘dehû tabh olunacak nân-ı azîzin mecmû‘u zikrolunan Rusya hıntasında dirhemi az olmakdan ise elli bin kilede yirmi bin keyli Rusya hıntası ve on bin kilesi cedîd Tekfurdağı hıntası beş bin keyl-i cedîd Bergos hıntası ve beş bin kilesi dahi cedîd münakkah ve yedi bin beş yüz kile atîk mahlût hıntası ve iki bin beş yüz keyl kokoroz olmak üzere Anbâr-ı âmireden i‘tâ ve beş bin keyl dahi Varna’nın Arnavud dakīkinden ilâve olunarak çaşni tutuldukda hem kerestesi temiz ve hem dirhemi ziyâde olacağı zâhir olduğundan ol vechile tahn ve tabhı husûsu ibâdullâha enfa‘ olacağına mebnî tensîb ve tasvîb olunmuş ve tutulan numûneye nazaran zehâyir-i mezkûrenin birbiri üzerine bi’l-mukāseme beher kilesine beş buçuk guruş bahâ vaz‘ ve takdîr olunduğu hâlde hâsıl olan dakīkden nân-ı azîzin yüz yirmi dirhemi dört paraya olarak tabh olunacağı tahakkuk ve tebeyyün etmiş ve ekmekçi esnâfı dahi bu vechile zehâyir-i merkūmenin beher keyli beşer buçuk guruşa olarak verildiği sûretde sâye-i adâlet-vâye-i şâhânede zarâr etmeyip kâr edeceklerini beyân ederek numûne-i mezkûr sikkesini bozmamak şartıyla yüz yirmi dirhemi dört paraya olarak nân-ı azîz tabh eyleyeceklerini Zahîre nâzırı efendi ve İhtisâb ağası ve Kapanbaşı efendi hâzır oldukları hâlde huzûrunuzda ma‘kūd ve meclis-i şer‘de habbâzân ve uncular kethüdâları ve bi’l-cümle nizâm ustaları ta‘ahhüd etmiş olduklarından ol vechile tabh ve i‘mâline irâde-i seniyye ta‘alluk eylediği hâlde francalacı esnâfı dahi Rusya hıntası tekmîline değin nef‘an li’l-ibâd nân-ı azîz i‘mâl etmek üzere ol bâbda esnâf-ı merkūmenin ta‘ahhüdlerini şâmil takdîm olunan i‘lâmınız ile tutulan numûneler huzûr-ı âtıfet-nüşûr-ı şâhâneye lede’l-arz fîmâ ba‘d [58b] francala bey‘i her tarafda men‘ olunarak mecmû‘-ı francala fırınlarında dahi sâir fırınlar misilli irâe olunan yüz yirmi dirhemlik numûne vechile nân-ı azîz tabh ve ibâdullâha dörder paraya fürûht olunması ve numûne vechile işlenip zinhâr sikkesi bozulmaması husûsuna irâde-i seniyye-i mülûkâne ta‘allukuyla ol bâbda hatt-ı şerîf-i şâhâne-i merhamet-efzâ-yı sudûr buyrulmuş ve iktizâ eden zahîresinin bi-mennihî te‘âlâ işbu şehr-i Cumâdelâhire’nin yirmi ikinci günü zikrolunan dörder paralık nân-ı azîzin tabhına her fırınlarda def‘aten mübâşeret olunması mûmâ-ileyh Zahîre nâzırı efendiye tenbîh kılınmış olmağla siz dahi nâzır-ı mûmâ-ileyhle İhtisâb ağası hâzır oldukları hâlde bi’l-cümle esnâf kethüdâları ve nizâm ustaları vesâir iktizâ edenleri celb ile bu vechile hâs ve temiz işlenmek ve işbu zahîre işlenip zinhâr âhar zahîre karışdırılmamak ve bu cihetle dirhem ve kerestesine noksan ve halel getirilmemek ve pişkin olmak ve tabh edecekleri nân-ı azîzi vaktiyle ziyâdece pişirip sa‘at on birden sonraya ekmek tabhı tehîr olunmamak ve bu vesîle ile fırınlar pîşgâhında cem‘iyyet ve izdihâm ile ekmek yağması olmamak üzere ber-vech-i ta‘ahhüd bi-mennihî te‘âlâ yevm-i merkūmda fırınlarda ol vechile nân-ı azîz tabh ve i‘mâline mübâderet eylemelerini ekîden tenbîhe dikkat ve hilâfı hareket edenlerin bilâ-emân tertîb-i cezâ olunacaklarını iktizâ edenlere telkīn ve tefhîm ve o makūle hilâfına mütecâsir oluru bulunur ise derhâl isim ve şöhretini Bâb-ı âlî’ye inbâ ve terkīm ile bu husûsa bizzât nezâret ve ikdâm ve dikkat eyleyesiz deyü. Fî 16 min C sene 1243.