İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 329 Hüküm no: 167 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanmış ve harap olmuş fırınların tamir ettirilmesi Bâ-sahh-ı âlî. İstanbul kādısı fazîletlü efendi. Muhterik ve mu‘attal fırın ve değirmenlerin tanzîmi bâbında. Dersa‘âdet’de nân-ı azîz tabh olunur fırınlar ve değirmenler ve uncu taşları mukaddem ve muahhar vukū‘ bulan harîklerde yanmış ve bunlara bakılmayarak bir takımı dahi harâb olmuş olduğundan meselâ bir fırın kendi mahallesinden başka sâir fırını olmayan mahallelere nân-ı azîz vermeğe muhtâc olduğundan meşakkat çekilmekde ve bu cihetle taşradan un celbine ihtiyâc messetmekde olduğundan bu keyfiyet ibâdullâhın dûçâr-ı zarûret ve ıztırâb olmalarına sebeb-i müstakil olmak ve sâye-i merhamet-vâye-i şâhânede tevsî‘-i dâire-i ma‘âş-ı ibâdı mûcib esbâbın icrâsı zimmetinde müterettib bulunmak hasebiyle bu maddenin istihsâl-i hüsn-i nizâm ve râbıtası lâzım gelmiş ve o makūle muhterik ve münhedim olan fırınların bir kıt‘a defteri tarafınıza gönderilmiş olmağla defter-i mezkûrda muharrer fırınların mülk ve gedik sâhibleri mevcûd oldukları hâlde Zahîre nâzırı efendi ve Kapan nâibi efendiyle İhtisâb ağası ve kethüdâ ve nizâm ustaları ve tüccâr vesâir lâzım gelenleri celb ile zikrolunan muhterik ve münhedim olan fırınlar ve değirmen ve uncu taşlarının ashâbı taraflarından iktizâsı vechile inşâ ve ta‘mîrleri sûret-i râbıtasını istihsâle dikkat ve keyfiyeti Bâb-ı âlî’ye ifâde ve i‘lâmâ mübâderet eyleysin deyü buyruldu. Fî 2 min- C sene 1243.