İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 342 Hüküm no: 170 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mora isyanı nedeniyle piyasada sahtesi çoğalan Adlî altının piyasadan çekilerek basımına başlanılan ve Hayriye ismi verilen altınla değiştirilmesi Bâ-sah. İstanbul kādısı fazîletlü efendi ve İhtisâb ağası. Fîmâ ba‘d Adlî altını kat‘ olunmaması bâbında emr-i âlîdir. Cümleye ma‘lûm olduğu üzere Darbhâne-i âmirede kat‘ ve i‘mâl olunan on ikilik ve nısfiyye-i rub‘iyyesinin resm ve hey’etine bir diyecek yoğise de yedi sekiz seneden beri isyân üzere olan Rum re‘âyâsı Mora cezîresinde ve mahâll-i sâirede ve Efrenc tâifesi dahi ba‘zı yerlerde zikrolunan on ikilik altınına şibh kalb ve kem ayâr sikke kat‘ ve neşriyle mübâya‘a maddesine ihtilâl vermiş ve taraf-ı Devlet-i aliyyeden bu maddeye her ne kadar ihtimâm ve takayyüd-i tâm olunmuş ise de yine küllen küllen men‘i esbâbı istihsâl olunamamış olduğuna ve her işin esâsı sikke maddesi olarak bir çâresi istikmâliyle fesâd-ı mezkûrun önü kesdirilmesi lâzım geldiğine mebnî bu bâbda kerâmet-efzâ-yı sudûr olan emr ve irâde-i seniyye-i şâhâne muktezâ-yı münîfi üzere zikrolunan on ikilik ve nısfiyyesinin kat‘-ı ve i‘mâli terk olunarak tammı kırk guruş ve nısfı yirmi ve rub‘u on guruşa râyic olmak ve beyaz akçeden dahi yirmilik ve rub‘ kat‘ ettirilmek üzere tasvîb ve işbu kat‘ olunacak altına Hayriyye ismi tesmiyesi tensîb <> buyrularak müte‘allık olan irâde-i seniyye-i mülûkâne mûcebince bi-meşiyyetillâhi te‘âlâ kat‘ ve darbına teşebbüs olunmuş olup ancak bu vechile on ikilik ve nısfının terkiyle işbu sikke-i cedîde-i müstahsenenin kat‘ ve darbından garaz-ı aslî o makūle usât-ı re‘âyâ <> ve Efrenc tâifesinin derkâr olan fesâd ve mel‘anetlerinin def‘i irâde-i hayriyyesine mebnî olduğuna göre fîmâ ba‘d gerek ecnâs-ı altın ve bâ-husûs Adlî ve altmışlık ve Zolota’nın fiyat-ı kadîmelerinin zinhâr ve zinhâr tezâyüd bulmayarak herkes yedinde bulunan on ikiliklerini Darbhâne-i âmireye ve çarşıda ik‘âd olan mübâya‘acılara verip sikke-i cedîde ahz eylemeleri husûsuna irâde-i aliyye-i mülûkâne ta‘alluk etmiş olmakdan nâşî keyfiyet lâzım gelenlere buyruldular neşriyle tenbîh ve tekîd kılınmış olmağla siz dahi keyfiyeti eimme-i mahallât ve esnâf kethüdâlarını ve sâir lâzım gelenleri celb ile herkes yedinde bulunan atîk altınlarını Darbhâne-i âmireye veyâhud çarşıda ik‘âd olan mübâya‘acılara götürüp cedîd kat‘ olunan Hayriyye altınına tebdîl ettirmelerini ve bundan böyle zikrolunan Adlî altınına şibh kalb ve kem ayâr sikke her kimin yedlerinde bulunur ise haklarında tedîb-i mu‘âmelesi icrâ olunacağını gûş-ı hûşlarına ilkā ve tefhîme mübâderet eyleyesin deyü. Fî 10 C sene 1243.