İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 354 Hüküm no: 174 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İşsiz kalan tabancacı esnafının Tüfenkhane-i Âmire’de istihdam edilmesi Tabancacı esnâfına dâir ilmuhaberdir Tabancacı esnâfı el-hâletü hâzihî Tüfenkhâne-i Âmire’de Asâkir-i Mansûre isti‘mâl eyledikleri harbeli tüfenklerin i‘mâli hizmetinde olup İstanbul’da Parmakkapı ve mahâll-i sâire ve Galata’da mutasarrıf oldukları yetmiş yedi bâb tabancacı dükkânı gedikleri metrûk kalıp mülk ashâbına lâzım gelen icârlarını i‘tâ ile mağdûru’l-hâl oldukların beyânıyla zikr olunan gediklerinin fürûhtu husûsuna müsâ‘ade-i aliyye erzân buyrulmasını esnâf-ı merkūme bâ-arzuhâl istid‘â etmekden nâşî kuyûd-ı lâzimesi ba‘de’l-ihrâc muktezâsı bâ-fermân-ı âlî Cebehâne-i Âmire nâzırı sa‘âdetlü atûfetlü efendi hazretlerinden isti‘lâm olundukda esnâf-ı merkūmenin yüz doksan iki târîhinde beyne’l-esnâf vukū‘ bulan münâza‘alarının def‘i bâbında emr-i şerîf verilmiş olup gediklerinin sarâhaten kaydı bulunmadığı derkenârdan ve esnâf-ı merkūmenin bundan böyle sâlifü’z-zikr dekâkînlerinin küşâdıyla işlemelerine ruhsat verilip Tüfenkhâne-i Âmire’de istihdâm olunacaklarını ve merkūmûn hizmet-i me’mûrlarında sadâkat ve istikāmetle çalışmakda olup fi’l-vâki‘ fakīru’l-hâl ve şâyeste-i eşfâk-ı seniyye olduklarını Tüfenkhâne nâzırı sa‘âdetlü atûfetlü Tahir Beyefendi ihbâr ve ifâde etmiş olmağla bu sûretde mîr-i mûmâ-ileyhin ifâdesi vechile esnâf-ı merkūmenin fîmâ-ba‘d Tüfenkhâne-i Âmire’de istihdâm olunacakları derkâr olduğundan başka zikr olunan gediklerin dahi Başmuhâsebe’de sarâhaten kaydı bulunmadığından mutasarrıf oldukları gediklerinin bu def‘a bâ-irâde-i seniyye men‘ olunan kahvehâne gediği misillü âhar esnâf kendi san‘atına gedik i‘tibâr eylemek şartıyla tâliblerine fürûhtu husûsuna ruhsat-ı seniyye şâyân buyrulduğu hâlde mülk mutasarrıfları taraflarından muhâlefet olunmamak için esnâf-ı merkūme tarafına ruhsatı hâvî başka ve keyfiyet ma‘lûm olmak için fazîletli semâhatlü İstanbul kādısı efendi hazretleri tarafına başka ilmuhaberleri i‘tâsı menût-ı re’y-i sâmîleri idüğü bâ-takrîr lede’l-arz mûcibince başka başka ilmuhaberleri i‘tâsıyla tanzîm olunmak bâbında sâdır olan fermân-ı âlî mûcibince kaydolunup esnâf-ı merkūme tarafına ruhsatı hâvî başka ilmuhaberi verilmekle keyfiyet ma‘lûm olmak için İstanbul kādısı fazîletli semâhatlü efendi hazretleri taraflarına dahi işbu ilmuhaber verildi. Fî 3 min Ca sene 1243